Lögreglan í Brumunddal í Noregi hefur handtekið eiginmann hinnar 36 ára gömlu Janne Jemtland, sem saknað hefur verið í fjórtán daga, vegna gruns um að hann hafði ráðið henni bana. Þetta kom fram á blaðamannafundi lögreglunnar fyrr í kvöld. Fréttamiðillinn VG greinir frá. Lík hennar hefur hins vegar ekki fundist, en lögregla segir allt benda til þess að hún hafi verið myrt.
Fram kom á fundinum að eiginmaðurinn yrði yfirheyrður í kvöld og í framhaldinu farið fram á gæsluvarðhald yfir honum. Hann mun ekki hafa streist á móti handtökunni.
Janne, sem er tveggja barna móðir, virðist hafa farið brott af heimili sínu aðfaranótt 29. desember síðastliðins eftir að hún kom heim úr veislu ásamt eiginmanni sínum. Hann tilkynnti þó ekki um hvarf hennar fyrr en tæpum sólarhring síðar. Þá leið sólarhringur til viðbótar þar til lögregla hóf formlega leit.
Blóð hefur fundist úr Jemtland á tveimur stöðum með eins kílómetra millibili. Spor og blóð úr henni fannst í um 12 kílómetra radíus frá heimili hennar.
Viðtæk leit hefur staðið yfir að henni og lögreglunni hafa borist yfir 200 ábendingar vegna hvarfsins. Björgunarsveitarfólk, leitarhundar og þyrlur ásamt lögreglu hafa meðal annars tekið þátt í leitinni að henni.
Þá voru í dag tveir fólksbílar fjarlægðir af heimili þeirra hjóna og sendir til rannsóknar, einnig var framkvæmd rannsókn á heimili þeirra.
Rannsóknarlögreglumaðurinn Trond Blikstad sagði í samtali við VG að niðurstöður rannsókna síðustu daga hefðu leitt til handtökunnar. Lögreglan hefði frá því á gamlárskvöld farið yfir ótal vísbendingar og væri í raun enn að gera það. Hann benti á að hjónin ættu tvö börn og þau fengju nú viðeigandi aðstoð. „Barnavernd hefur fengið þau í sína umsjá. Við biðum í raun með að halda blaðamannafund og gefa út tilkynningu um málið barnanna vegna,“ sagði hann jafnframt.