Vinningshafinn sem var með allar tölur réttar í Lottóinu síðastliðinn laugardag er kominn í leitirnar.
Sú heppna sá fréttir dagsins í dag þar sem hennar var leitað og hafði samband við Íslenska getspá.
Keypti konan miðann í smáforriti getspár en var aðeins með heimasíma skráðan og úrelt netfang.
Þegar hún tók eftir fréttum dagsins í dag skoðaði hún forritið og komst að því að hún væri níu milljón krónum ríkari. Í kjölfarið hafði hún samband við skrifstofu Íslenskrar getspár.
„Vinningshafinn er að vonum lukkuleg með allar milljónirnar og hefur þegar uppfært allar sínar upplýsingar í Lottóappinu og hvetur aðra spilara til að gera slíkt hið sama,“ segir í tilkynningu.