„Börðumst vel fyrir þessu stigi“

„Þetta var erfitt en við unnum vel fyrir þessu stigi og þetta gekk bara nokkuð vel hjá okkur,“ sagði Alfreð Elías Jóhannsson, þjálfari Selfoss, sem gerði 0:0 jafntefli við Íslandsmeistara Þórs/KA í Pepsi-deild kvenna í knattspyrnu í kvöld.

Selfyssingar urðu þar með fyrsta liðið til þess að ná stigi af meisturunum í deildinni í sumar.

„Þær áttu fleiri færi og héldu boltanum betur innan liðsins, það var dálítið panikk á okkur þegar við vorum með boltann. En við héldum góðu skipulagi allan tímann. Ég er klárlega ánægður með þetta stig. Þetta er eitt af betri liðunum á landinu, frábært lið og vel skipulagt hjá Donna og félögum. En við getum líka staðið í hvaða liði sem er þegar við spilum okkar leik,“ bætti Alfreð við.

„Við gerðum hlutina vel í dag og börðumst vel fyrir þessu stigi. Þannig er þetta hérna á þessum velli, það er enginn að koma á okkar heimavöll til þess að taka eitthvað af okkur,“ sagði Alfreð að lokum.

• Blogga um frétt