Íþróttir | Formúla 1 | mbl | 17.6.2018 | 14:39 | Uppfært 16:13

Alonso vann í Le Mans

Mynd 1 af 10 Sigurlið Toyota í Le Mans (f.v.): Kazuki Nakajima, Fernando Alonso og Sebastien Buemi. AFP

Mynd 2 af 10 Sigursveit Toyota í Le Mans (f.v.) Fernando Alonso, Kazuki Nakajima og Sebastien Buemi. AFP

Mynd 3 af 10 Sigurtríóið á Toyotabílnum góða. AFP

Mynd 4 af 10 Liðsmenn Toyota fagna tvöföldum sigri bíla liðsins í Le Mans. AFP

Mynd 5 af 10 Þátttaka Fernando Alonso í Le Mans vakti mikla athygli og bæði áhorfendum og blaðamönnum fjölgaði frá því sem verið hefur. AFP

Mynd 6 af 10 Sigurtríó Toyota í Le Mans (f.v.) : Kazuki Nakajima Fernando Alonso og Sebastien Buemi. AFP

Mynd 7 af 10 Toyotatríóið á verðlaunapallinum í Le Mans ásamt fulltrúa liðsins. Frá vinstri: Fernando Alonso, Sebastien Buemi og Kazuki Nakajima. AFP

Mynd 8 af 10 Fernando Alonso í forystu 86. sólarhringskappakstursins í Le Mans. AFP

Mynd 9 af 10 Fernando Alonso (t.h.) og Sebastien Buemi sátu á bílnum síðustu metrana að verðlaunapallinum í Le Mans. AFP

Mynd 10 af 10 Frá vinstri: Shigela Tomoyama forstjóri Toyota, Fernando Alonso, Sebastien Buemi og Kazuki Nakajima fagnandi á verðlaunapallinum í Le Mans. AFP

Toyota vann sólarhringskappaksturinn í Le Mans í Frakklandi í dag og er þetta fyrsti sigur japanska bílsmiðsins. Honum óku til skiptis Fernando Alonso, Japaninn Kazuki Nakajima og Svisslendignurinn Sebastien Buemi.

Alonso vann með þessu sigur í Le Mans í fyrstu tilraun en Toyota var að keppa í tuttugasta skipti. Á undanförnum árum hefur bíllinn ekki reynst endingartraustur en bót hafði verið ráðin á því nú og átti Toyota tvo fyrstu bílana í mark.

Þátttaka Alonso, hins tvöfalda heimsmeistara í formúlu-1, dró mikla athygli að kappakstrinum en í stúkum brautarinnar fylgdust 256.900 manns með keppninni. Hann er nú einn af aðeins sjö ökumenn sögunnar sem fagnað hafa sigri bæði í Le Mans og Mónakó. Í þeim hópi auk hans eru Tazio Nuvolari, Maurice Trintignant, Bruce McLaren, Jochen Rindt og Graham Hill.

Hill er aftur á móti eini ökumaður sögunnar sem ásamt þessu hefur einnig farið með sigur af hólmi í mesta kappakstri Bandaríkjanna, Indy 500. Þríkórónu þá sækist Alonso eftir en í frumrauninni í fyrradugði bíllinn ekki alla leið.

Alls kepptu að þessu sinni í Le Mans 23 ökumenn með keppnisreynslu úr formúlu-1. Frægastir þeirra auk Alonso eru Jenson Button og Juan-Pablo Montoya. Button varð heimsmeistari 2009 en í Le Mans bilaði bíll hans á leiðinni og féll úr leik. Montoya hefur unnið sjö mót í formúlu-1, auk þess að vera fyrrverandi meistari úr bæði IndyCar og Champ Car í Bandaríkjunum.