Arnór Ingvi Traustason og samherjar hans hjá Malmö eru komnir í bikarúrslit í sænska fótboltanum eftir sigur á Mjällby á útivelli í undanúrslitum í dag. Réðust úrslitin í vítaspyrnukeppni.
Arnór Ingvi var í byrjunarliði Malmö og lék fyrstu 69 mínúturnar. Tókst honum ekki að skora frekar en öðrum leikmönnum og var staðan markalaus eftir venjulegan leiktíma og framlengingu.
Í vítakeppninni skoraði Malmö úr fjórum spyrnum en Mjällby aðeins tveimur. Mætast Malmö og Gautaborg í úrslitum, en Gautaborg hafði betur gegn Elfsborg í framlengdum leik í dag, 1:0.