Spánn hafði betur gegn Serbíu, 32:28, í fyrri leik liðanna í umspili um laust sæti á HM 2025 í handknattleik karla í Lalín á Spáni í kvöld.
Liðin mætast öðru sinni í Serbíu á sunnudag og er einvíginu síður en svo lokið.
Í kvöld var allt í járnum í fyrri hálfleik og staðan 15:14, Spáni í vil, að honum loknum.
Í síðari hálfleik náðu Spánverjar undirtökunum og komust fljótt þremur mörkum yfir, 19:16.
Undir lokin komst Spánn fimm mörkum yfir og það tvisvar áður en Serbía skoraði síðasta mark leiksins.