Verkalýðsfélög sjómanna og vélstjóra um land allt felldu kjarasamninga við SFS með miklum meirihluta. Kosningu lauk á hádegi í dag. Verkfall er boðað 10. nóvember næstkomandi.

„Já, það er alveg áreiðanlegt. Menn eru að fara í verkfall,“ sagði Valmundur Valmundsson, formaður Sjómannasambands Íslands.

Beðið er niðurstaðna frá tveimur félögum utan af landi en þau eru fámenn og niðurstaða á landsvísu er sú að um eða yfir 90% sjómanna felldu samningana og samþykktu verkfallsboðun. 

Frétt mbl.is: Vélstjórar samþykktu verkfall

„Ef ekki semst, þá hefst verkfallið 10. nóvember næstkomandi,“ segir Valmundur. „Vonandi semst nú fyrir þann tíma, en við erum komnir með afgerandi umboð frá sjómönnum um það hvað þeir vilja. Þeir eru klárir í átök ef ekki semst.“

„Blæs á málflutning útgerðanna.“

Aðspurður um það hvaða mál það eru sem sjómönnum svíði helst við þá kjarasamninga sem felldir voru segir Valmundur það vera fyrst og fremst fiskverðið. Sjómenn telji það verð sem þeir fá fyrir aflann óviðunandi. „Mönnunarmálin koma líka inn í þetta, sem og fatakostnaður.“

Eins vilja menn sjá málefni varðandi lögbundna orlofs- og desemberuppbót færð til betri vegar: „Sjómenn eru eina starfsstéttin í landinu sem nýtur ekki slíks, og ég blæs á þann málflutning útgerðanna að sjómenn eigi ekki rétt á slíku sökum þess að þeir vinna á hlutaskiptum. Það er út í hött,“ segir Valmundur Valmundsson, formaður Sjómannasambands Íslands.

Tengdar fréttir

Kjaramál sjómanna

„Þetta er hrein og klár misnotkun“

• Sjómönnum tryggt 54% meira fyrir þorskinn
• „Er þetta réttlát skipting?“
• „Nóg er komið af rugli og misskilningi“
• Níu ára stöðugleikaskeið í kjaramálum sjómanna

» Fleiri tengdar fréttir

• Blogga um frétt