„Rækjusjómenn eru að fá tvöfalt högg“

Ráðlegging Hafrannsóknastofnunar um að skera niður rækjukvóta í Ísafjarðardjúpi er mikil vonbrigði að sögn Gunnar Torfasonar útgerðarmanns sem gerir út bátinn Halldór Sigurðsson ÍS. Gunnar segir óhagstæða gengisþróun og skerðingu á rækjukvóta tvöfalt högg fyrir rækjusjómenn.

Viðtal við hann má sjá á bb.is.

Hafrannsóknastofnun leggur til að kvótinn í vetur verði 484 tonn en hann var 700 tonn síðasta vetur. Að sögn Gunnars ætlar Hafrannsóknastofnun að funda með rækjusjómönnum og útgerðarmönnum á morgun.

„Rannsókninni var breytt í ár. Dröfnin hefur verið notuð til þessa en Bjarni Sæmundsson var notaður í ár. Það er gríðarlega mikill stærðarmunur á skipunum og það verður fróðlegt að heyra hvernig það gekk að beita Bjarna í Djúpinu,“ segir Gunnar.

Gunnar segist þó ekki hafa misst alla trú á að vertíðin geti orðið ágæt: „Það hefur verið farið í aukarannsókn í febrúar og það hefur marg oft gerst að kvótinn hefur verið aukinn eftir það,“ segir hann. 

Þó eru fleiri vandkvæði viðloðandi rækjuiðnaðinn fyrir vestan en minnkandi veiði á innfjarðarækju.

„Þetta leggst ofan á mjög óhagstæða gengisþróun. Bretlandsmarkaður er mjög mikilvægur fyrir rækjuna og hrun breska pundsins gagnvart krónu um 35% á einu ári þýðir að rækjusjómenn eru að fá tvöfalt högg,“ segir Gunnar Torfason.

• 1 blogg um fréttina

Bloggað um fréttina

• Geir Ágústsson: Af hverju verja sjómenn ekki útgerðina?