„Ætlumst til þess að þeir klári deiluna“
Setja bókamerki
„Þeir voru einfaldlega að upplýsa mig um stöðuna og svo voru skoðanaskipti um eitt og annað,“ segir Þorgerður Katrín Gunnarsdóttir sjávarútvegsráðherra í samtali við mbl.is, eftir fund með deiluaðilum í sjómannadeilunni í kvöld.
Samninganefndir beggja fylkinga í kjaradeilu sjómanna gengu fyrir stundu út úr sjávarútvegsráðuneytinu við Skúlagötu 4. Þorgerður segist hafa lagt fram tillögu um skoðun á fæðis- og dagpeningum.
„Ég lagði fram tillögu um heildstæða nálgun og greiningu og að við myndum fara hratt í það að skoða fæðis- og dagpeninga á almennum vinnumarkaði, með tilliti til skattaívilnana, þannig að við sjáum þá hvernig staðan er. Það er það sem við erum tilbúin til að gera,“ segir ráðherrann.
Spurð hvernig deiluaðilar hefðu tekið tillögunni segir Þorgerður að þeir ætli að skoða málin, en samninganefndirnar héldu aftur upp í Karphús að loknum fundi sínum með ráðherra.
Þorgerður segir að þetta ætti ekki að verða til þess að deilan myndi lengjast.
„Deiluaðilar eru búnir að deila í á tíundu viku og þeir hljóta að ráða við það að semja í þessari mikilvægu atvinnugrein. Það er einföld krafa sem við hljótum öll að gera til þeirra. Það er mjög sérstakt og eiginlega einsdæmi ef ríkisvaldið á eftir á, þegar menn eru nokkurn veginn að koma sér saman, að koma síðan og uppfylla kröfu sem gæti sent ekki réttu skilaboðin inn í komandi kjaradeilur,“ segir Þorgerður. Bætir hún við að nú yrðu menn að anda rólega.
„Enn sem fyrr ber ég mikið traust til samningsaðila, að þeir nái að leysa þetta og klára málið.“
Spurð hver næstu skref væru nú í deilunni er svar Þorgerðar einfalt: „Ríkisvaldið er ekki aðili að deilunni og samningsaðilar hljóta að halda áfram að tala. Það er það sem við ætlumst til af þeim; að klára deiluna.“
Pútín reynir allt til að forðast aðra herkvaðningu
50 milljónir eiga að minnka svindl um 1 milljarð
Sjötti ferðamaðurinn er látinn
Vegirnir voru eins og borðstofuborð
Ása Ellerup flutt út og ætlar að selja húsið