Konráð Þorsteinn Alfreðsson, varaformaður Sjómannasambands Íslands, segist ánægður með að sjómenn hafi samþykkt nýjan kjarasamning.

„Ég er afskaplega feginn. Ég vil bara segja það. Ég tel að sjómenn hafi tekið skynsamlega afstöðu til samningsins. En auðvitað var þetta tæpt, því miður var það þannig að við fengum ekki afgerandi úrslit, ef svo má segja,“ segir Konráð í samtali við mbl.is.

„En þetta er fagnaðarefni.“

Spurður hvað hann telji valda því, að svo mjótt sé á munum sem raun ber vitni, en aðeins 52,4% greiddra atkvæða féllu með samningnum, nefnir hann samfélagsmiðilinn Facebook.

„Ég held, því miður, að Facebook sé stór þátttakandi í þessu,“ segir hann og bætir við að menn séu einfaldlega misvel upplýstir um efni samningsins.

„Til dæmis, á síðunni „Sjómenn á Íslandi“, þar var meirihlutinn vitleysa, af því sem þar kom fram. Þessu trúa menn, það er bara þannig, því miður. Sérstaklega ungu mennirnir, sem þekkja kannski ekki kjarasamninginn út í eitt. Eðlilega verða þeir fyrir áhrifum af þessu.“

Tengdar fréttir

Kjaramál sjómanna

Djúpkarfakvótinn tryggði laun sjómanna

• Verðlagsstofuverð þorsks hækkar mikið
• „Þetta er hrein og klár misnotkun“
• Sjómönnum tryggt 54% meira fyrir þorskinn
• „Er þetta réttlát skipting?“

» Fleiri tengdar fréttir

• Blogga um frétt