Valmundur Valmundsson, formaður Sjómannasambands Íslands, segir niðurstöðu atkvæðagreiðslunnar leggjast vel í sig, en sjómenn samþykktu fyrr í kvöld nýjan kjarasamning með 52,4% atkvæða.

„Þetta hafðist. Auðvitað var þetta tæpt en þetta hafðist,“ segir Valmundur í samtali við mbl.is og bætir við að kynningarfundir aðildarfélaganna á samningnum hafi tekist vel.

„Ég held að mönnum hafi snúist hugur þar, miðað við hvernig andinn var þegar við skrifuðum undir. Þegar menn fóru og sáu kynningarnar á samningnum.

Þetta hefði ekki mátt vera mikið tæpara?

„Nei þetta er búið að vera stresskvöld núna. En einföld niðurstaða gildir og nú störfum við samkvæmt samningnum og náum sátt um það. Við komum standandi niður allir og ég held við förum bara að vinna betur saman. Ég held að þetta verkfall hafi kennt okkur það.“

Hvað gerði útslagið?

„Ég held að það sé bara skynsemin, ég held að það sé ekkert annað,“ svarar Valmundur og bætir við að mikil vinna sé fram undan, við að framfylgja samningnum.

Þá segir hann baráttunni um skattaafslátt af fæðispeningum ekki lokið.

„Við finnum einhverja leið til að sjómenn fái eitthvað í staðinn fyrir alla sína löngu fjarveru.“

Eruð þið sátt við aðkomu sjávarútvegsráðherra að þessu máli?

„Ég vil ekkert vera að tala um það núna. Svona er pólitíkin og hún vinnur svona. Auðvitað hefðum viljað sjá að hún hefði sagt já við því sem við vildum. En maður fær ekki allt í lífinu.“

Tengdar fréttir

Kjaramál sjómanna

Níu ára stöðugleikaskeið í kjaramálum sjómanna

• SVG og VM samþykktu samninginn
• Segir samninganefnd vélstjóra sniðgengna
• Felur í sér styttri vinnuviku og aukið mótframlag
• Vélstjórar undirrituðu samning við SFS

» Fleiri tengdar fréttir

• 1 blogg um fréttina

Bloggað um fréttina

• Jóhannes Ragnarsson: Konnarnir liggja hvur um annan þveran í forarvilpunni