Skinney Þinganes byggir undir starfsmenn sína á Höfn

Skinney Þinganes ætlar að byggja allt að tólf íbúðir og leigja til starfsmanna fyrirtækisins. Helmingur íbúðanna verður klár í haust og restin um áramót gangi áætlanir eftir. Í umfjöllun um mál þetta í Morgunblaðinu í dag segir að markmiðið sé að tryggja starfsmönnum fyrirtækisins húsnæði, en hornfirski húsnæðismarkaðurinn hefur ekki farið varhluta af fjölgun ferðamanna.

Á Höfn hefur í nokkur ár verið mikill skortur á húsnæði, bæði til kaups og leigu. Leigumiðlanir á borð við Airbnb hafa tekið til sín húsnæði í sveitarfélaginu undir gistingu í ferðaþjónustu og erfiðlega hefur gengið að fá iðnaðarmenn til starfa, enda nóg af verkefnum að hafa við uppbyggingu ferðaþjónustunnar, s.s. byggingu hótela og gistiheimila, sem hefur fjölgað hratt á Hornafirði og í nágrenni undanfarin misseri.

Björn Ingi Jónsson, bæjarstjóri Hornafjarðar, kveðst spenntur fyrir uppbyggingunni, en annað fimm íbúða fjölbýlishús mun rísa samtímis fjölbýlishúsinu sem Skinney mun byggja. Það verður í eigu sjálfseignarstofnunar á vegum sveitarfélagsins.

Ekkert verið byggt síðan 2014

Öll uppbyggingin mun fara fram á Leirusvæðinu svonefnda í austurhluta bæjarins. Eins og segir að framan stefnir Skinney að því að hafa klárar í haust sex smærri íbúðir í einingahúsum á nyrðri reitnum, en fjölbýlishúsin tvö sem reist verða af Skinney og sveitarfélaginu verða á syðri reitnum sem má sjá á myndinni að ofan, skammt frá iðnaðarhverfi bæjarins.

Ekkert hefur verið byggt af íbúðarhúsnæði síðan 2014 og hafa bæjaryfirvöld Hornafjarðar reynt að koma til móts við verktaka með því að fella niður byggingarleyfisgjöld og eru lóðirnar því boðnar án endurgjalds. Björn Ingi segir ástæðu þess að ekkert hafi verið byggt undanfarin ár vera mismun á byggingarkostnaði og söluverðmæti fasteigna. En með gefins lóðum og hærra fasteignaverði sé staðan orðin önnur. „Við erum núna komin á þann stað að það er mikil vöntun og mismunurinn er minni en verið hefur,“ segir Björn Ingi.

Hann segir að stefnt sé eins prósents fjölgun íbúa á Hornafirði næstu árin. „Til þess þurfum við að ná uppbyggingu með sex til sjö íbúðareiningum á ári,“ segir Björn Ingi, sem vonast til þess að byggt verði meira á komandi árum. „Sígandi lukka er best. Það er best að fá þetta jafnt og þétt. Sex til átta húseiningar á ári væri gott til að byrja með,“ segir hann.