319 bátar byrjaðir á strandveiðum

Nú eru 319 bátar byrjaðir á strandveiðum. Afli þeirra fyrstu vikuna var 433 tonn, en heimilt var að róa þrjá daga.

Aflinn fékkst í 651 róðri og er meðaltalið í róðri því 665 kíló, en úr hverri veiðiferð er heimilt að koma með 650 kíló, í þorskígildum talið, af kvótabundnum tegundum.

Að venju eru flestir strandveiðibátanna á svæði A, sem nær frá Arnarstapa til Súðavíkur, en þar var 161 bátur byrjaður í vikunni. Það eru þremur fleiri en samanlagður fjöldi á hinum svæðunum þremur, að því er fram kemur á heimasíðu Landssambands smábátaeigenda.