Brúar „gamli“ Páll bilið í Eyjum?

Vinnslustöðin í Vestmannaeyjum afhendir Gullbergið VE um miðjan júlí, en skipið var í vetur selt til Noregs. Hugsanlegt er að fyrirtækið kaupi gamla Pál Pálsson ÍS af Hraðfrystihúsinu - Gunnvöru hf. og noti það skip þar til fyrirtækið fær nýtt skip frá Kína, samkvæmt heimildum Morgunblaðsins.

Í Kína er verið að smíða tvo nýja ísfisktogara fyrir Vinnslustöðina og HG, systurskipin Breka og nýjan Pál Pálsson.

Einn af Japanstogurunum

Afhending skipanna hefur dregist, en nú er von á þeim til landsins síðsumars eða í haust. Gamli Páll Pálsson er 45 ára gamalt skip, smíðað í Japan 1972. Verði af því að Vinnslustöðin kaupi skipið yrði það aðeins til að brúa bilið í nokkra mánuði þar til Breki verður kominn í fulla virkni. Samkvæmt upplýsingum blaðsins þykir gamli Páll Pálsson hentugur í það verkefni, en málið er ekki frágengið.

Greint var frá málinu á fréttamiðlinum Bæjarins besta á Ísafirði fyrir helgi og kemur þar fram að innan skamms ljúki 45 ára sögu togarans Páls Pálssonar ÍS í útgerðarsögu Hnífsdals og Ísafjarðar.

„Skipið hefur verið til sölu í tvö ár. Við erum ekki alveg búnir að ganga frá sölu en við vonumst til að það skýrist mjög fljótlega,“ segir Einar Valur Kristjánsson, framkvæmdastjóri Hraðfrystihússins – Gunnvarar hf., í samtali við BB.

Fyrirtækið hefur fundað með áhöfn Páls og kynnt henni áformin. Einar Valur segir að gangi salan eftir fari Páll til nýs eiganda um mánaðamótin júní júlí.