Síldarstofninn minnkar

Norsk-íslenski síldarstofninn er um 4,2 milljónir tonna, sem er umtalsverð minnkun frá í fyrra er stofninn mældist 5,4 milljónir tonna. Þetta er niðurstaða alþjóðlegs uppsjávarleiðangurs í Noregshafi sem fram fór í maí. Auk rannsóknarskipsins Árna Friðrikssonar tóku þátt skip frá Noregi, Færeyjum, Danmörku og Rússlandi. Fram kemur að síðasti stóri árgangur norsk-íslenska síldarstofnsins sé frá 2004 en bundnar eru vonir við að 2016-árgangurinn reynist stór.

Hitastig sjávar var mælt á svæðinu og reyndist yfir meðaltali síðustu tveggja áratuga á öllum svæðum, einkum sunnan- og vestanlands. Samhliða því fannst meira æti á öllum rannsóknarsvæðum en í fyrra.

Kolmunna var að finna utan landgrunns á nær öllu rannsóknarsvæðinu ef frá er talið svæði austanlands þar sem hins kalda Austur-Íslandsstraums gætir. Vísbendingar eru um að 2014- og 2015-árgangarnir séu stórir.

Niðurstöður rannsóknarinnar verða nýttar á fundi Alþjóðahafrannsóknaráðsins (ICES) í ágúst þar sem mat á stofnstærðum og ráðgjöf um uppsjávarfiskistofna fer fram. agunnar@mbl.is