Fiskast vel hjá Bergey fyrir austan

Bergey VE og Vestmannaey VE hafa verið að afla vel á Austfjarðamiðum það sem af er hausti. Í síðustu viku landaði Bergey 60 tonnum á Seyðisfirði og aftur í gær 78 tonnum. Uppistaða aflans er ýsa og þorskur. Þetta kemur fram í frétt á vef Síldarvinnslunnar. 

Bergey og Vestmannaey veiða mest á Austfjarðamiðum á haustin og fram yfir áramót. Skipin hafa lengi lagt mikla áherslu á ýsuveiðar eystra en upp á síðkastið hafa þorskveiðar einnig skipt máli. Bæði skipin hafa landað á Eskifirði, Norðfirði og Seyðisfirði en nú er einnig landað í Vestmannaeyjum eftir þriðja hvern túr. 

Haft er eftir Jóni Valgeirssyni, skipstjóra á Bergey, þegar hann var að toga í Vonarbrekkunni austan við Hvalbakinn að það hefði verið fínasta fiskirí að undanförnu. „Við lönduðum á Seyðisfirði um 60 tonnum hinn 16. október og síðan aftur í gær 78 tonnum. Uppistaða aflans er ýsa og þorskur. Í fyrri túrnum vorum við mest í Litladýpi og á Breiðdalsgrunni en í seinni túrnum á Glettinganesgrunni. Ég geri síðan ráð fyrir að við löndum í Eyjum að loknum yfirstandandi túr.“

• 1 blogg um fréttina

Bloggað um fréttina

• Björn Jónsson: Kemur ekki á óvart......