Gullver ekki veitt betur í tuttugu ár

Ísfisktogarinn Gullver NS hefur verið að gera það gott að undanförnu en í nýliðnum októbermánuði var afli skipsins um 730 tonn í sjö löndunum á Seyðisfirði. Uppistaða aflans var þorskur en einnig var lögð töluverð áhersla á að veiða ýsu og karfa.

„Síðasti mánuður var mjög góður hjá okkur og tíðin var afskaplega hagstæð. Aflabrögð voru góð og aflinn fékkst að mestu á okkar hefðbundnu miðum. Þorskurinn var veiddur á Breiðdalsgrunni og Litladýpinu, ýsan að drjúgum hluta á Gerpisflaki og Tangaflaki og karfinn fékkst einkum í Berufjarðarál,“ er haft eftir Þórhalli Jónssyni skipstjóra Gullvers á vef Síldarvinnslunnar.

Rætt var við Þórhall í morgun en þá var skipið statt við Litladýpi austan við Breiðdalsgrunn.

Meiri kvóti lykillinn að árangri

„Það hefur verið betri veiði á þessum miðum en undanfarin haust. Lykillinn að þessum góða árangri er meiri kvóti en við höfum haft til ráðstöfunar áður. Við getum veitt af krafti og stopp á milli túra eru styttri en áður. Venjulega tökum við þrjá túra og síðan er stoppað í um tvo sólarhringa. Þetta hefur gengið vel og menn eru mjög ánægðir með þetta fyrirkomulag,“ segir Þórhallur. 

Haft er eftir Adolf Guðmundssyni rekstrarstjóra á Seyðisfirði að líklega séu liðin um 20 ár frá því að Gullver skilaði á land jafn miklum afla í einum mánuði. Útgerðin gangi vel og þess sé ávallt gætt að fiskvinnslustöðin á Seyðisfirði hafi nægt hráefni til vinnslu.

• Blogga um frétt