Verndarsvæðið stækkað og minnkað á víxl

Verndarsvæði hvala í Faxaflóa hefur stækkað og minnkað á víxl. Ekki beint af náttúrulegum völdum heldur ákvörðunum ráðherra.

Verndarsvæðið hefur lengi verið bitbein hagsmunaaðila, það er ferðaþjónustunnar, sem gerir út á hvalaskoðun í Flóanum, og hrefnuveiðimanna.

Austan línu frá Garðskaga til Skógarness er nú verndarsvæði.

Þrír ráðherrar sjávarútvegsins hafa komið að breytingum á svæðinu og það var eitt af síðustu verkefnum Þorgerðar Katrínar Gunnarsdóttur í stól sjávarútvegsráðherra að stækka griðasvæðið og takmarka þá um leið svæði til hrefnuveiða.

Eftir atvikum hafa hagsmunahópar ítrekað látið í sér heyra síðasta áratuginn.

Verndarsvæðið er nú jafn stórt og eftir að Steingrímur J. Sigfússon kom því fyrst á vorið 2009. Hann stækkaði það sjálfur 2013, skömmu áður en hann lét af embætti.

Aðeins sex vikum síðar minnkaði Sigurður Ingi Jóhannsson griðasvæðið á nýjan leik.