Bátur strand við Stykkishólm – einn slasaður

Björgunarliðar eru á leið á vettvang þar sem bátur strandaði í námunda við Stykkishólm. Stjórnstöð Landhelgisgæslunnar barst neyðarkall frá farþegabáti kl. 14:15 í dag, sem hafði steytt á skeri á Breiðafirði, um 3 km austur af Stykkishólmi.

Samkvæmt upplýsingum standa aðgerðir yfir, en níu manns voru um borð í bátnum og er einn sagður slasaður.  Fiskibátarnir Arna og Blíða, auk farþegaskipsins Særúnar, eru á leið á staðinn. Léttbátur frá Særúnu býr sig undir að taka farþegana um borð.

Berserkir, björgunarsveit Slysavarnafélagsins Landsbjargar, hefur verið kölluð út á fyrsta forgangi. TF-LIF, þyrla Landhelgisgæslunnar, heldur á vettvang eins fljótt og auðið er en hún er nýbúin að flytja fólk til Reykjavíkur frá slysstaðnum við Kirkjubæjarklaustur þar sem rúta valt fyrr í dag.

Kort/map.is

Uppfært kl. 15.10: 

Samkvæmt upplýsingum frá Þórði Þórðarsyni, varðstjóra lögreglunnar í Stykkishólmi, er um að ræða farþegabátinn Austra SH.

Nú rétt fyrir kl. 15 var búið að bjarga öllum farþegum um borð í Særúnu. Farið verður með fólkið í Stykkishólm þar sem það fær aðhlynningu. Samkvæmt upplýsingum frá Sveini H. Guðmarssyni, upplýsingafulltrúa Landhelgisgæslunnar, er sá slasaði ekki talinn alvarlega slasaður. Farþegabáturinn mun enn vera fastur á skerinu.

Þegar ljóst var að öllum farþegum var borgið var TF-LIF, þyrla Landhelgisgæslunnar, kölluð aftur til Reykjavíkur.

Farþegabáturinn Austri SH. Ljósmynd/Ríkharður Ríkharðsson

• Blogga um frétt