Vilja auknar veiðiheimildir

Enn hefur engin niðurstaða fengist í samningaviðræður Íslendinga og Færeyinga um gagnkvæmar fiskveiðiheimildir, en núgildandi samningur landanna rennur út um áramótin.

Lítið hefur miðað í viðræðunum undanfarnar vikur en samkvæmt heimildum Morgunblaðsins hafa Færeyingar farið fram á umtalsverða aukningu veiðiheimilda í íslenskri lögsögu.

Færeyingar hafa samkvæmt núgildandi samningi haft heimild til að veiða 30 þúsund tonn af loðnu og um 5.600 tonn af bolfiski hér við land, en þeir telja þann kvóta ekki fullnægja aukinni útflutningseftirspurn. Þá hefur Morgunblaðið heimildir fyrir því að hafi samningar ekki náðst fyrir áramót verði Íslendingum bannað að veiða kolmunna og annan uppsjávarfisk í færeyskri lögsögu.