ESB vill óbreyttar veiðar við Bretland

Evrópusambandið setur það sem skilyrði fyrir mögulegum fríverslunarsamningi við Bretland eftir að Bretar hafa yfirgefið sambandið að fiskiskip frá ríkjum þess geti veitt áfram í breskri efnahagslögsögu með sama hætti og áður.

Einstök ríki Evrópusambandsins sem hagsmuna eiga að gæta þegar kemur að veiðum á Bretlandsmiðum höfðu áður sett fram slíka kröfu auk þess sem Evrópuþingið hafði tekið undir hana í minnisblaði sem lekið var til fjölmiðla.

Frétt af mbl.is

ESB vill veiða áfram við Bretland

Samninganefnd Evrópusambandsins hefur nú sett kröfuna um óbreyttar veiðar fiskiskipa frá ríkjum sambandsins í breskri lögsögu fram sem hluta af tilboði sínu til Breta.

Skoskir sjómenn hafa mótmælt kröfu Evrópusambandsins harðlega og hvatt bresk stjórnvöld til þess að hafna þeim. Bresk stjórnvöld hafa sagt að til greina komi að semja um gagnkvæm fiskveiðiréttindi en þau yrðu að vera sanngjarnari fyrir breska sjómenn en áður.

Bretlandi stendur til boða fríverslunarsamningur með 100% tollfrelsi fyrir vöruútflutning inn á markað Evrópusambandsins en takmarkaðan aðgang fyrir fjármálaþjónustu.

Bresk stjórnvöld hafa hins vegar lagt ríka áherslu á greiðan aðgang fyrir fjármálafyrirtæki sem starfa í Bretlandi að innri markaði Evrópusambandsins.

Fjallað er meðal annars um málið í frétt breska dagblaðsins Daily Telegraph.

• 1 blogg um fréttina

Bloggað um fréttina

• Páll Vilhjálmsson: ESB krefst aðgangs að fiskimiðum Breta