Formenn fjögurra verkalýðsfélaga, VR, Eflingar, Framsýnar og Verkalýðsfélags Akraness, hafa sent frá sér yfirlýsingu þar sem fordæmd eru „ólýðræðisleg vinnubrögð trúnaðarmannaráðs Sjómannafélags Íslands og brottrekstur Heiðveigar Maríu Einarsdóttur úr félaginu.“ Minnt er í því sambandi á að stéttarfélög eigi að vera samkvæmt lögum opin öllum sem starfa á því starfssvæði sem kjarasamningar viðkomandi stéttarfélags ná til. 

„Félagsaðildinni fylgja mikilvæg réttindi sem eru hluti af velferð launafólks á vinnumarkaði og hún tryggir vernd félagsmanna í samskiptum sínum við atvinnurekendur. Þetta kemur skýrt fram á heimasíðu Sjómannafélags Íslands þar sem sérstaklega er fjallað [um] dagpeninga og styrki til félagsmanna, orlofskosti þeirra og aðgang að lögfræðiþjónustu svo fáein dæmi séu tekin. Stéttarfélagi er undir engum kringumstæðum heimilt að reka félagsmann úr félaginu og svipta hann þar með þessum réttindum,“ segir í yfirlýsingu þeirra Aðalsteins Árna Baldurssonar, formanns Framsýnar stéttarfélags, Sólveigu Önnu Jónsdóttur, formanns Eflingar stéttarfélags, Vilhjálms Birgissonar, formanns Verkalýðsfélags Akraness, og Ragnars Þórs Ingólfssonar, formanns VR. Tilefnið er sú ákvörðun trúnaðarmannaráðs Sjómannafélagsins að vísa Heiðveigu úr félaginu en hún hafði sóst eftir formennsku í því.

Enn fremur er bent á að aðild að stéttarfélagi feli jafnframt í sér rétt til lýðræðislegrar þátttöku og áhrifa i félaginu með málfrelsi, tillögurétti, atkvæðisrétti og kjörgengi. „Krafa um greiðslu félagsgjalda í þrjú ár til þess að öðlast kjörgengi innan félagsins felur augljóslega í sér ólögmætar hömlur á frelsi og réttindi félagsmanna og slíkt þekkist ekki innan íslenskrar verkalýðshreyfingar.“

Skoðanaágreiningur ekki tilefni brottrekstrar

Formennirnir benda á að alvarleg brot félagsmanna gegn félaginu, til að mynda ef hann vinnur með atvinnurekendum gegn hagsmunum þess, geta í alvarlegustu undantekningartilvikum leitt til þess að hömlur verði settar á atkvæðisrétt og kjörgengi. Hins vegar sé skoðanaágreiningur og gagnrýni á störf félagsins ekki slík brot heldur skýrt aðeins til marks um lýðræðislega þátttöku í starfsemi félagsins.

„Leiða má af því líkur að skoðanir Heiðveigar á starfsemi Sjómannafélags Íslands og ákvörðun hennar um að gefa kost á sér til formanns í félaginu sé ástæðan fyrir þessum hörðu viðbrögðum af hálfu trúnaðarmannaráðs félagsins. Í því efni hefur hún einungis nýtt sér félagsbundin réttindi sín og stjórnarskrárvarið málfrelsi sem augljóslega hefur komið við kaunin á forystu félagsins. Þess vegna er mikilvægt að félagsmenn Sjómannafélags Íslands bregðist við samþykkt félagsins og mótmæli henni harðlega.“

Verði ákvörðunin ekki afturkölluð segja formennirnir að Sjómannafélag Íslands sé þar með að skrifa nýjan kafla í sögu verkalýðshreyfingarinnar sem ekki sé sómi af. „Formenn VR, Eflingar stéttarfélags, Framsýnar stéttarfélags og Verkalýðsfélags Akraness skora því á forystu Sjómannafélags Íslands að virða lög og reglur sem gilda almennt um starfsemi stéttarfélaga og kjörgengi félagsmanna á vegum verkalýðshreyfingarinnar og afturkalla ákvörðun sína um brottrekstur Heiðveigar Maríu Einarsdóttur þegar í stað.“

Tengdar fréttir

Kjaramál sjómanna

„Þetta er hrein og klár misnotkun“

• Sjómönnum tryggt 54% meira fyrir þorskinn
• „Er þetta réttlát skipting?“
• „Nóg er komið af rugli og misskilningi“
• Níu ára stöðugleikaskeið í kjaramálum sjómanna

» Fleiri tengdar fréttir

• 2 blogg um fréttina

Bloggað um fréttina

• Örn Gunnlaugsson: Hver á félagið ?
• Páll Vilhjálmsson: Sósíalistafélögin styðja Heiðveigu