Stjórnvöld stefna að banni á álaveiðum

Drög hafa nú verið gerð að banni við álaveiðum á Íslandi. Þetta kemur fram á vefsíðu Samráðsgáttarinnar, opins samráðs stjórnvalda við almenning.

Í umfjöllun á síðunni kemur fram að ákvæði hafi verið lögfest sem gerir sjávarútvegs- og landbúnaðarráðherra kleift að banna veiðar á álum í samræmi við ráðleggingar Hafrannsóknastofnunar. Hafrannsóknastofnun gaf í fyrra út ráðgjöf þar sem hún tók fram að álastofninn væri í hættu og þyldi veiðar illa.

Í umfjöllun um veiðar þessar í Morgunblaðinu í dag segir Sigurjón Vídalín Guðmundsson, sem hefur lengi stundað álaveiðar á Suðurlandi, ekki kippa sér upp við fréttirnar og býst ekki við því að bann við álaveiðum muni mæta verulegri mótstöðu.