Stefna á skráningu í Amsterdam

Stjórn Marel hefur ákveðið að stefna að skráningu hlutabréfa félagsins í kauphöllinni Euronext í Amsterdam, samhliða skráningu í kauphöllinni á Íslandi.

Áður hefur verið greint frá áformum Marel um tvíhliða skráningu en valið stóð á milli Euronext í Amsterdam annars vegar og Nasdaq í Kaupmannahöfn hins vegar.

Hlutfallsleg stærð Marel umhugsunarefni

Aðalfundur félagsins fór fram í höfuðstöðvunum í Garðabæ síðdegis í dag. Í skýrslu stjórnarformanns Marel, Ásthildar Otharsdóttur, kemur fram að markmiðið með tvíhliða skráningu sé að auka seljanleika hlutabréfanna og styðja við frekari vöxt og virðisaukningu fyrir alla hluthafa félagsins.

Skráning hlutabréfa Marel í Kauphöllinni 1992 hafi verið gæfuspor til frekari framþróunar og vaxtar félagsins, en ljóst sé að hlutfallsleg stærð Marel á íslenskum verðbréfamarkaði er umhugsunarefni.

Áform um tvíhliða skráningu hlutabréfa Marel í alþjóðlega kauphöll, til viðbótar við þá íslensku, ganga samkvæmt áætlun að því er segir í skýrslu Árna Odds Þórðarsonar, forstjóra Marel.

„Það er mikilvægt að alþjóðlegt fyrirtæki á borð við Marel hafi alþjóðlegan vettvang til að styðja við frekari vöxt og virðisaukningu. Tvíhliða skráning á alþjóðlegum markaði í erlendum gjaldmiðli gerir hlutabréf félagsins að áhugaverðum kosti sem hluta af kaupverði í mögulegum yfirtökum. Fimm alþjóðlegir bankar hafa verið fengnir til ráðgjafar við skráninguna og sem umsjónaraðilar útboðs. Við hlökkum til samstarfs við þá og Euronext-kauphöllina í Amsterdam varðandi næstu skref.“

Frétt af mbl.is

Sjálfkjörið í stjórn Marels

• 1 blogg um fréttina

Bloggað um fréttina

• Jóhannes Ragnarsson: Sest að í Rauða hverfinu í Amsturdammi