„Þarna mun hann standa um ókomna tíð“

Nýr innsiglingarviti fyrir Reykjavíkurhöfn, austan við Höfða við Sæbraut í Reykjavík, er kominn á sinn stað. Á viti þessi að koma í stað eldri vita í turni Sjómannaskólans sem var í notkun allt þar til háhýsin við Höfðatún fóru að skyggja á hann. Auk þess að auðvelda siglingu inn í Reykjavíkurhöfn er reiknað með því að vitinn muni laða að sér ferðamenn, en útsýni frá honum er með allra besta móti.

Gísli Gíslason, hafnarstjóri Faxaflóahafna, kvaðst í samtali við Morgunblaðið á miðvikudag vera afar ánægður með vitann.

„Lagt var upp með að halda í þau einkenni sem eru í Skarfagarði og gömlu höfninni. Og það er ástæða þess að þessi viti lítur út eins og hann gerir – glæsilegur og þarna mun hann standa um ókomna tíð,“ segir Gísli í samtali við Morgunblaðið og vísar til gömlu vitanna sem Reykvíkingar þekkja svo vel. „Þegar búið er að tengja hann verður innsiglingin aftur eins og vera ber.“

Frétt af mbl.is

Nýi vitinn kominn á sinn stað