Allt gengið vel og enginn sjóveikur

„Við nálgumst Vík á hægri siglingu,“ segir Gísli Valur Gíslason, einn skipstjóra Herjólfs, við mbl.is. Nýr Herjólfur er væntanlegur til Vestmannaeyja í kvöld og verður formleg móttökuhátíð vegna þess á morgun.

Herjólfur lagði af stað frá Gdynia Í Póllandi, þar sem nýr Herjólf­ur var smíðaður, á sunnudagsmorgun þaðan sem stefnan var sett á Vestmannaeyjar fyrir utan stutt stopp í Færeyjum.

Gísli segir að gert sér ráð fyrir því að skipið verði við Vestmannaeyjar um klukkan sex í kvöld. „Við verðum tollaðir um klukkan átta og förum inn eftir miðnætti og tæmum dekkið,“ segir Gísli.

Fréttaritari mbl.is náði þessari mynd af Herjólfi nú síðdegis þar sem hann sigldi framhjá Vík í Mýrdal. Mbl.is/Jónas Erlendsson

Frétt af mbl.is

Formleg móttökuathöfn vegna Herjólfs

Formleg móttökuathöfn í Friðarhöfninni í Vestmannaeyjum hefst klukkan 14:15 á morgun. Samgönguráðherra, forstjóri Vegagerðarinnar, formaður bæjarráðs og fulltrúi Vestmannaeyjaferjunnar Herjólfs flytja þá ræður. Prest­ur Landa­kirkju mun blessa skipið og Katrín Jak­obs­dótt­ir for­sæt­is­ráðherra form­lega nefna það.

Í fram­haldi verður skipið bæj­ar­bú­um og öðrum gest­um til sýn­is. Boðið verður upp á veit­ing­ar, skemmti­atriði og fleira milli klukk­an 14:30 og 16.

Tekur tíma að kynnast skipinu

„Ég hugsa að það verði fín mæting á þetta,“ segir Gísli en hann telur að töluverð spenna sé í Eyjunni vegna komu nýju ferjunnar. 

Nýr Herjólf­ur rist­ir grynnra en sá gamli og því þarf ekki að dýpka jafn mikið fyr­ir nýtt skip. Mun það auðvelda og flýta fyr­ir dýpk­un og mun fækka dög­um sem ekki er unnt að sigla í Land­eyja­höfn.

Gísli segir að það muni taka tíma að læra á skipið og kynnast því. „Líkt og það var þegar Landeyjahöfn opnaði. Menn voru bara að átta sig á aðstæðum.“

Hann segir að siglingin heim á leið hafi gengið vel og hlær og svarar því neitandi hvort einhver um borð hafi orðið sjóveikur. 

„Við fengum alveg skítaveður í Norðursjónum og þar var smá veltingur. Það hefði örugglega ekki verið fyrir alla.“

Guðbjartur Ell­ert Jóns­son, fram­kvæmda­stjóri Herjólfs ohf., sagði í samtali við mbl.is á sunnudaginn að vonir stæðu til að nýja skipið verði kom­inn í al­menn­an rekst­ur milli lands og Eyja um næstu mánaðar­mót, að því gefnu að allt gangi upp.

• 1 blogg um fréttina

Bloggað um fréttina

• Jóhann Elíasson: VAR VIRKILEGA REIKNAÐ MEÐ MIKILLI SJÓVEIKI Í "RENNIBLÍÐU"???????