Björgólfur: Erfiðara en Seðlabankamálið
Setja bókamerki
Björgólfur Jóhannsson, starfandi forstjóri Samherja, segir að Samherjamálið svokallaða, sem hann kallar „víðtæka árás á félagið“, hafi verið enn erfiðara viðfangs en Seðlabankamálið. Þá segir hann að fyrirtækið reyni að bregðast við ásökunum á ábyrgan hátt og að þær sem hafi verið settar fram eigi að stórum hluta ekki við rök að styðjast. Þetta er meðal þess sem kemur fram í pósti Björgólfs til starfsmanna Samherja.
Vísar Björgólfur til þess að Samherji hafi á dögunum sent frá sér yfirlýsingu þess efnis að félagið Cape cod FS á Marshalleyjum væri ekki í eigu Samherja, en í umfjöllun Kveiks og Stundarinnar kom fram að félagið hefði verið notað til að yfirfæra meira en 70 milljónir bandaríkjadollara í gegnum Cape Cod. Kveikur hefur áður sent frá sér yfirlýsingu þess efnis að aldrei hafi verið haldið fram í umfjölluninni að Samherji ætti Cape Cod, en að bankinn DNB hafi reyndar talið svo vera, enda hafi starfsmaður Samherja verið prókúruhafi og stofnandi reiknings félagsins hjá bankanum.
/frimg/1/17/20/1172040.jpg)
Segir Björgólfur í póstinum að þar sem Samherji hafi aldrei átt Cape Cod FS þýði það í reynd að enginn fótur sé fyrir ásökunum um peningaþvætti sem settar hafi verið fram. Segir hann að lögmenn Samherja hafi fundað með bæði skattrannsóknarstjóra og héraðssaksóknara og hafi afhent embættunum gögn um þetta. Þá hafi einnig lögmenn frá Wikborg Rein fundað með héraðssaksóknara og verið í samskiptum við norsku efnahagsbrotadeildina Økokrim í Osló.
Ítrekar Björgólfur jafnframt fyrri yfirlýsingu fyrirtækisins um að Jóhannes Stefánsson, uppljóstrari og fyrrverandi starfsmaður Samherja, hafi handvalið tölvupósta sem hafi verið birtir á vefsíðu Wikileaks. Aðeins hafi 42% af tölvupóstum sem voru í tölvupósthólfi Jóhannesar á tímabilinu 2014-2016 verið birt. „Það vekur ýmsar spurningar. Hvert var efni þeirra pósta sem ekki voru birtir? Hvers vegna voru þau tímabil sem um ræðir valin en ekki allt tímabilið? Sú staðreynd að 58% af tölvupóstunum voru aldrei birt hlýtur að vera umhugsunarefni fyrir þá sem telja að frásögn Jóhannesar Stefánssonar sé rétt og sannleikanum samkvæm,“ segir Björgólfur í póstinum.
Segir Björgólfur að unnið sé að því að greina ásakanir á hendur félaginu enda séu margar þeirra mjög alvarlegar. Hins vegar hafi aðeins verið sagt frá annarri hlið þeirra í fjölmiðlum. „Það er erfitt fyrir félagið og starfsmenn að sitja þegjandi undir þessu. Þið getið treyst því að við munum svara öllum þessum ásökunum. Ég bið ykkur hins vegar um skilning því þetta mun taka tíma,“ segir hann við starfsfólkið.
Undir lok póstsins þakkar hann starfsfólkinu fyrir framlag þess og segir að sameinað muni félagið standa þetta af sér. „Þessi víðtæka árás á félagið, sem staðið hefur yfir undanfarnar vikur, hefur verið enn erfiðari viðfangs en sú sem við glímdum við í Seðlabankamálinu. Við vitum hins vegar að sameinuð munum við standa þetta af okkur. Ég vil að þið vitið að stjórnendur Samherja eru óendanlega þakklátir fyrir ykkar framlag til fyrirtækisins. Án ykkar væri félagið ekki leiðandi í evrópskum sjávarútvegi. Við ætlum að gera allt sem við getum til að tryggja að svo verði áfram.“
Stór gagnaleki opinber mánuðum saman
Ók í gegnum rúðu og reyndi að nema banka á brott
Býst við meiri aðsókn í janúar
Heitar sturtur skaðlegar: Mælt með moðvolgu vatni
Segir lögreglu hafa hætt við þegar lögmaður mætti
Fær leyfi til að rífa bústaði
„Við munum grípa inn í“