1.242 reglugerðir felldar brott

Alls hafa 1.242 reglugerðir á sviði sjávarútvegs og landbúnaðar verið felldar brott á síðustu mánuðum. Samkvæmt upplýsingum úr sjávarútvegs- og landbúnaðarráðuneytinu standa þá eftir ríflega 700 reglugerðir fyrir landbúnað, matvæli, fiskeldi og sjávarútveg.

Í október felldi Kristján Þór Júlíusson, sjávarútvegs- og landbúnaðarráðherra, brott 1.098 reglugerðir og nú hafa 144 reglugerðir bæst við, 59 á sviði matvæla og landbúnaðar og 85 reglugerðir á sviði sjávarútvegs og fiskeldis.

Einföldun regluverks er meðal annars gerð með því að uppfæra, sameina og fella brott reglugerðir sem gerir það að verkum að regluverk verður aðgengilegra. Einnig er um að ræða reglugerðahreinsun sem fellir brott tímabundnar reglugerðir sem hafa ekki lengur gildi og felldar eru brott reglugerðir sem hafa verið settar með stoð í lögum sem hafa verið felld úr gildi, að því er fram kemur í Morgunblaðinu í dag.