Far þorsks við Ísland gæti verið að breytast

Fréttir frá sjómönnum herma að erfiðlega hafi gengið að veiða þorsk á hefðbundnum slóðum á Vestfjarðamiðum í sumar og haust.

Merkingar á þorski í fyrra benda til að þorskur hafi fært sig af hefðbundinni fæðuslóð fyrir norðvestan land yfir á nyrðri slóðir, segir á heimasíðu Hafrannsóknastofnunar.

„Þessar frumniðurstöður gætu bent til að far þorsks við Ísland sé að breytast, en hvort það er tímabundið eða ekki er erfitt að segja til um. Þær sýna jafnframt að mikilvægt er að stunda merkingar reglulega þannig að hægt sé að fylgjast með ferðum þorsksins,“ segir þar.

Þar er fjallað um merkingar á þorski og byggt á samantekt á niðurstöðum merkinga á þorski í gegnum tíðina, hafi það komið fiskifræðingum á óvart hversu margir þorskar sem merktir voru í mars 2019 á Vestfjarðamiðum endurheimtust við Kolbeinsey og einnig hve langt austur þeir leituðu. Þetta stangist á við fyrri rannsóknir sem hafi bent til þess að takmarkaður samgangur væri á milli norðvestur- og norðausturmiða.