Ekkert varð úr lokahátíð fyrir starfsmenn í frystihúsi Síldarvinnslunnar á Seyðisfirði á laugardag eins og venja er, vegna gruns um að starfsmaður hafði smitast af kórónuveirunni, að því er fram kemur á vef fyrirtækisins.

Þar segir að grunur hafi vaknað á föstudag um að starfsmaður sem hafði glímt við veikindi væri smitaður og var viðkomandi sendur í sýnatöku. Óvissa var um hver niðurstaða sýnatökunnar yrði og því ákveðið að fresta gleðskap starfsmanna, en stefnt er á að láta á það reyna að halda hátíðina frekar í haust ef aðstæður leyfa.

„Við ákváðum tafarlaust að það eina ábyrga í stöðunni var að fresta starfsmannaslúttinu fyrst ekki lá fyrir niðurstaða úr sýninu. Það var mikil eftirvænting og spenna fyrir slúttinu meðal starfsmanna og vonumst við til að geta boðið þeim upp á starfsmannaskemmtun í haust,“ er haft eftir Róberti Inga Tómassyni framleiðslustjóra.

Bent er á að „umræddur starfsmaður er búinn að fá niðurstöðu úr sýninu og reyndist það blessunarlega neikvætt“.

Ágæt framleiðsla

Hefð er fyrir því að haldin sé eins konar lokahátíð starfsmanna vegna sumarstoppa, en frá og með morgundeginum stöðvast starfsemi frystihússins og hefst ekki að nýju fyrr en eftir verslunarmannahelgi. Fram kemur að klárað hafi verið að vinna afla úr Gullveri í gær og er verið að þrífa í dag. Einhverjir starfsmenn munu sinna viðhaldsverkefnum í sumar.

Þá segir að framleiðslan hafi gengið ágætlega það sem af er ári. „Framleiðslan hefur verið lituð af kórónuveirunni og höfum við þurft að laga framleiðslu afurða að breyttri eftirspurn á mörkuðum. En sóttvarnir hafa gengið vel hjá okkur, við lokuðum á allar utanaðkomandi heimsóknir og breyttum verkferlum með það í huga að draga úr hættu á smiti. Framleiðsla afurða hefur gengið ágætlega hjá okkur mest er framleitt af þorski, ýsu og ufsa,“ segir Róbert Ingi.

Tengdar fréttir

Kórónuveiran Covid-19

Í fimm ára fangelsi fyrir að hvetja til hryðjuverka

• Stefna Norðmenn ríkinu vegna bólusetninga?
• 30% með langvarandi áhrif covid
• Mættu hafa í huga þar sem þeir kvarta á Tene
• „Er ég virkilega að deyja?“

» Fleiri tengdar fréttir

Síldarvinnslan

Unnu úr 247 þúsund tonnum

• Jólasíld ársins í fötur
• Samherji tekur Birting á leigu
• Fjölnir til Noregs
• Kaup Síldarvinnslunnar ganga til baka

» Fleiri tengdar fréttir

• 1 blogg um fréttina

Bloggað um fréttina

• Ómar Geirsson: Þjóðfélag óttans.