Útflutningsverðmæti sjávarafurða dregst saman

Útflutningsverðmæti sjávarafurða var rúmlega 23,7 milljarðar króna í maímánuði. Er það tæplega 16% samdráttur í krónum miðað við útflutningsverðmæti í sama mánuði á síðasta ári en í erlendri mynt var samdrátturinn rúm 25%.

Þetta kemur fram á vef Samtaka fyrirtækja í sjávarútvegi, SFS.

Óvenjumikill útflutningur var á uppsjávarafurðum í maí í fyrra miðað við árstíma og var þar aðallega um útflutning á makríl að ræða. Verðmæti loðnubirgða var einnig mun minna í maí í ár en í fyrra en það má mögulega skýra með töfum á gögnum, enda hefur loðnubrestur verið tvö ár í röð.

Samdráttur útflutningsverðmæta sjávarafurða er 4% í krónum talið en 15% í erlendri mynt milli ára, ef útflutningsverðmæti uppsjávarafurða er undanskilið.

Þá hefur útflutningsverðmæti fyrstu fimm mánuði ársins dregist saman um tæp 7% í krónum talið ef miðað er við sama tímabil í fyrra. Samdráttinn má einkum rekja til tæplega 18% samdráttar í útfluttu magni. Lækkun á gengi krónunnar vegur þó upp á móti samdrættinum.

• 1 blogg um fréttina

Bloggað um fréttina

• Ómar Ragnarsson: COVID-19 áhrifin smjúga víða.