Dettifoss heim eftir 68 daga siglingu

Flaggskip íslenska kaupskipflotans, Dettifoss, er vætanlegt til hafnar í Reykjavík í fyrsta sinn síðdegis á mánudaginn. Dettifoss er stærsta skipið sem verið hefur í þjónustu íslensks skipafélags frá upphafi.

Eimskip fékk skipið afhent í Kína 2. maí sl. og það lagði af stað í heimferðina 7. maí. Dettifoss sigldi frá Guangzhou, þar sem hann var smíðaður, til Taicang, þar sem farmur var lestaður til Evrópu. Síðan var siglt frá Kína með viðkomu í Singapúr, Srí Lanka og gegnum Súesskurðinn inn í Miðjarðarhafið. Áfram var haldið til Rússlands með farm. Þaðan lá leiðin til Danmerkur en þar fór skipið inn í siglingaáætlun Eimskips. Lagt var af stað til Íslands frá Árósum í hádeginu í gær, að því er fram kemur í umfjöllun um heimkomu skipsins eftir helgi.

Í áhöfn eru 16 manns. Skipstjóri Dettifoss er Bragi Björgvinsson, margreyndur skipstjóri, og yfirvélstjóri er Gunnar Steingrímsson. Þegar skipið leggst að Kleppsbakka í Reykjavík hefur áhöfnin lagt að baki 68 daga siglingu.