Hluthafar selja við skráningu Síldarvinnslunnar
Setja bókamerki
Ekki er gert ráð fyrir að gefið verði út nýtt hlutafé í Síldarvinnslunni við skráningu félagsins á aðalmarkað Nasdaq Iceland, segir Gunnþór Ingvason, forstjóri fyrirtækisins, í samtali við 200 mílur. Þess í stað munu núverandi hluthafar selja af sínum hlut við skráninguna.
Tilkynnt var í morgun að stjórn Síldarvinnslunnar hafi ákveðið að hefja undirbúning að skráningu félagsins í Kauphöllina og gert ráð fyrir að það sé komið á markað á fyrri árshelming þessa árs. Þá sé markmiðið að opna félagið fyrir fleiri fjárfestum.
Spurður hvað hafi orðið til þess að ákveðið sé að skrá félagið á markað nú svarar Gunnþór: „Þetta hefur komið til tals og menn hafa fundið fyrir áhuga aðila á að koma að sjávarútvegi. Þessi ákvörðun er liður í því að svara því kalli.“ Hann segir þessa aðgerð til fallna að efla félagið til framtíðar.
Fjöldi hluthafa
Meðal núverandi hluthafa Síldarvinnslunnar er Samherji stærstur, en það fyrirtæki fer með 44,64% hlut. Þá fer Kjálkanes ehf. með 34,23% hlut en það félag er í eigu tíu einstaklinga og eru Anna og Ingi Jóhann Guðmundsbörn með hvort um sig 22,54%, en aðrir með minna. Þar á meðal Björgólfur Jóhannsson, einn tveggja forstjóra Samherja, sem fer með 8,67% hlut í Kjálkanesi.
Þá fer Samvinnufélag útgerðarmanna Neskaupstaðar með 10,97% hlut í Síldarvinnslunni. Eignarhaldsfélagið Snæfugl ehf. fer með 5,29% hlut í Síldarvinnslunni, en eigendur þess eru fjórir. Halldór Jónasson er stærsti hluthafi í Snæfugli með 54,25% en Björgólfur Jóhannsson minnsti hluthafi með 5%.
Hraunlón ehf., í jafnri eigu Einars Benediktssonar og Gísla Baldurs Garðarssonar, fer með 1,62% hlut í Síldarvinnslunni en aðrir hluthafar eru með minna en eitt prósent. Alls eru ríflega 280 hluthafar í félaginu og ekki ljóst hverjir eru nú að hugsa um að selja hluti sína.
„Ísland hefur veitt mér mikinn innblástur“
„Ég á 10-15 vini sem eru búnir að missa allt“
Vill að flokksþingi verði flýtt
Íbúar argir: Bærinn vill gistihús á flóðasvæði
Kölluðu til lögreglu á mótmæli Eflingar í Kringlu
Snýst meira um persónuna og minna um pólitík
Enginn fundur á dagskrá og stefnir í verkföll