Kristján Þór Júlíusson, sjávarútvegs- og landbúnaðarráðherra, gerði á fundi ríkisstjórnarinnar í morgun grein fyrir því að hann hefði í samræmi við ráðgjöf Hafrannsóknastofnunar undirritað reglugerð um veiðar á loðnu, að því er fram kemur í fréttatilkynningu frá atvinnuvegaráðuneytinu.

Hafrannsóknastofnun kynnti í gærkvöldi nýja ráðgjöf um veiðar á allt að 127.300 tonnum af loðnu á yfirstandandi vertíð, en fyrri ráðgjöf nam 61 þúsund tonnum.

Frétt af mbl.is

Ný loðnuráðgjöf hækkar til muna

Íslenskum skipum verður með reglugerðinni sem Kristján Þór undirritaði í morgun veitt heimild til veiða á 69.834 tonnum af loðnu. Skip annarra ríkja fá heimild til veiða á rúmlega 57 þúsund tonnum eða um 45% af heildarafla. Ástæða þess er í tilkynningunni sögð vera „gildandi samningar við önnur ríki sem taka þarf tillit til áður en til úthlutunar kemur til íslenskra skipa. Annars vegar er samningur við Norðmenn vegna þorskveiða íslenskra skipa í Barentshafi og hins vegar tvíhliða samningur við Færeyjar.“

Þá segir að „Hafrannsóknastofnun mun ekki fara til mælinga að nýju að óbreyttu en mun fylgjast með fréttum af miðunum og bregðast við ef vísbendingar koma um nýjar loðnugöngur“.

„Þessi ákvörðun er afrakstur umfangsmestu loðnuleitar seinni ári. Þetta er vissulega ekki mikið magn í sögulegu samhengi, en þetta er gríðarlega mikilvægt fyrir íslenskt samfélag enda útflutningsverðmæti upp á hátt í 20 milljarða. Öflugt samstarf stjórnvalda, sérfræðinga Hafrannsóknastofnunar og fyrirtækja í sjávarútvegi við þessa leit hefur verið lykillinn að þessum árangri,“ segir Kristján Þór Júlíusson, sjávarútvegs- og landbúnaðarráðherra.

Tengdar fréttir

Loðnuveiðar

Loðnumæling tafðist er Árni leitaði í var

• Fyrstu skipin til loðnumælinga
• „Við urðum örlítið varir við loðnu“
• Töf á mælingu vegna viðgerðar
• Lítið sást til loðnunnar

» Fleiri tengdar fréttir

• 1 blogg um fréttina

Bloggað um fréttina

• Sigurjón Þórðarson: Handlangari Hafró