Mikill hafís er norður af landinu

Meiri hafís er nú norður af landinu en undanfarin ár á þessum árstíma, að sögn Ingibjargar Jónsdóttur, dósents í landfræði við Háskóla Íslands.

Á meðfylgjandi gervihnattamynd sem tekin var í gær má sjá talsverðan og nokkuð þéttan ís fyrir norðan land en einnig stóra ísspöng sem teygir sig í átt að landinu.

Í gær var ísinn um 16 sjómílur (30 km) norður af Kögri. Ingibjörgu þótti líklegt að hann myndi lóna eitthvað nær næsta sólarhringinn. Spáð er suðvestanátt fram á aðfaranótt sunnudags og rekur vindurinn ísinn inn í hafstrauma sem bera hann nær landi. Á sunnudag á að hvessa og veðrið mun líklega sundra ísspönginni sem teygir sig næst landinu.

Meira er af ísspöngum við hafísjaðarinn þegar norðar dregur. Ingibjörg sagði það gefa vísbendingar um að vorið gæti orðið „áhugavert“ með tilliti til hafíssins, að því er fram kemur í Morgunblaðinu í dag.