„Indæl tilfinning að sigla inn Eyjafjörðinn“

Ekki verður annað sagt en að aflabrögðin hjá áhöfninni á Harðbaki EA, sem Útherðarfélag Akureyringa gerir út, hafi verið með ágætum. Á hundrað dögum eða frá 15. febrúar hefur samanlagður heildarafli ísfiskskipsins náð 3.018 tonnum og hefur meðalafli í hverri veiðiferð verið um 80 tonn.

Þessum merka áfanga var náð snemma í morgun er skipið, sem kom nýtt til Akureyrar í fyrra, kom til hafnar í Dalvík með 90 tonn, að því er fram kemur í færslu á vef Samherja.

Guðmund Ingvar Guðmundsson. Ljósmynd/Samherji

„Við vorum fyrir norðan Hornstrandir og þetta er mjög góður fiskur, rúmlega fjögur kíló og við vorum að taka sjö til átta tonn í holi. Við erum ellefu um borð, allt saman stálkarlar. Harðbakur hefur aðallega landað Í Þorlákshöfn, Hafnarfirði, Grundarfirði og í Bolungarvík, frá þessum stöðum er hráefninu svo ekið norður til Dalvíkur og Akureyrar. Í raun og veru er oftast landað næst þeim stað sem við erum við veiðar, sem skýrir fjölda veiðiferðanna að nokkru,“ er haft eftir Guðmund Ingvar Guðmundsson, skipstjóra á Harðbaki, í færslunni.

„Það eru tvær áhafnir á skipinu, Covid hefur haft töluverð áhrif á frítúra en núna fer þetta allt saman að komast í rétt horf hjá okkur. Jú, jú, það var sannarlega indæl tilfinning að sigla inn Eyjafjörðinn í nótt með fullfermi af góðum fiski og ekki skemmir fyrir að hafa rofið 3.000 tonna múrinn í leiðinni,“ segir Guðmundur.

Ljósmynd/Samherji

• 1 blogg um fréttina

Bloggað um fréttina

• Ómar Ragnarsson: "Að sigla´inn Eyjafjörðinn...".