„Stór og falleg demantssíld“

Sturla Þórðarson, skipstjóri á Beiti NK, kveðst hæst ánægður með síldina sem skipið kom með til Neskaupstaðar í gærkvöldi. Alls kom Beitir með 1.100 tonn af síld og fór hún um leið í vinnslu í fiskiðjuveri Síldarvinnslunnar, að því er fram kemur á vef útgerðarinnar.

„Við fengum þetta sunnarlega í Héraðsflóanum. Það var töluvert af síld að sjá þarna og það hefur víða orðið vart við síld hér austur af landinu. Þetta er góð síld sem um er að ræða – stór og falleg demantssíld. Aflinn fékkst í fjórum holum og það er reynt að draga stutt. Mér líst ágætlega á framhaldið. Það lítur allt út fyrir að þetta verði fínasta vertíð,“ segir Sturla.

Beitir NK kemur með síldarfarm til Neskaupstaðar. Ljósmynd/Síldarvinnslan/Guðlaugur B. Birgisson

• 1 blogg um fréttina

Bloggað um fréttina

• Ómar Geirsson: Stór og falleg demantssíld