Gert ráð fyrir 150 fyrirtækjum í Laugardalshöll

Gert er ráð fyrir að um 150 innlend og erlend fyrirtæki verði með bása á sjávarútvegssýningunni „Sjávarútvegur“ eða  „Iceland Fishing Expo 2022“, að því er fram kemur í tilkynningu. Sýningin er haldin í Laugardalshöll að venju og hefst á miðvikudag og lýkur á föstudag.

Mikill áhugi hefur verið á sjávarútvegsýningunni en hún var síðast haldin 2019 og var þá aðsóknarmet slegið er um 17 þúsund gestir sóttu hana.

Svandís Svavarsdóttir, matvælaráðherra, opnar sýninguna við hátíðlega athöfn og afhendir hún viðurkenningar til fjögurra aðila innan sjávarútvegsins og krýnir „Trillukarl ársins“. Sendinefnd frá Möltu mætir sérstaklega á sýninguna undir forystu dr. Alicia Bugeja Said matvælaráðherra.

mbl.is/Eggert Jóhannesson

„Sýningin er einstaklega fjölbreytt og áhugaverð og við finnum fyrir aukunum áhuga erlendra aðila enda íslensk sjávartæknifyrirtæki í fremstu röð. Á sýningunni eru allar tegundir af fyrirtækjum er þjóna íslenskum sjávarútvegi,“ segir Ólafur M. Jóhannesson, framkvæmdastjóri Ritsýnar sf. sem skipuleggur sýninguna.

„Gestir koma til með að sjá það nýjasta í hátækniútbúnaði er tengist fiskvinnslu og útgerð. Verða kynnt tæki og búnaður er mun hafa mikil áhrif á hina alþjóðlegu fiskvinnslu. Þá er mikið af nýjum fyrirtækjum að koma inn  með sýningarbása og  ber að nefna fyrirtæki sem þjóna fiskeldinu bæði á sjó og landi,“útskýrir hann.

Ólafur M. Jóhannesson. mbl.is/Eggert Jóhannesson

• 1 blogg um fréttina

Bloggað um fréttina

• Ómar Ragnarsson: Dreifbýli Evrópu í brennidepli á stóru dreifbýlisþingi í Póllandi.