Hafrannsóknastofnun ráðleggur að loðnuafli veturinn 2022/2023 verði ekki meiri en 218 400 tonn, að því er fram kemur í tilkynningu á vef stofnunarinnar. Um er að ræða 45,4% minna magn en gert var ráð fyrir í upphafsráðgjöf en hún nam 400 000 tonn og byggði á magni ókynþroska loðnu í haustmælingum 2021.

Þetta er tæplega 75% skerðing frá síðustu vertíð en vegna hennar nam ráðgjöf Hafrannsóknastofnunar 869.600 tonn. Íslensku skipin veiddu þá um 500 þúsund tonn og skilaði aflinn um 55 milljörðum króna í útflutningsverðmæti.

Frétt af mbl.is

Um 55 milljarða loðnuvertíð

Tekið er þó fram að ráðgjöfin verður endurskoðuð að loknum mælingum Hafrannsóknastofnunar á stærð veiðistofnsins í janúar/febrúar eins og aflaregla strandríkja fyrir stofninn gerir ráð fyrir.

Ráðgjöf Hafrannsóknastofnunar nú byggir á niðurstöðum bergmálsmælinga á loðnustofninum á rannsóknaskipunum Árna Friðrikssyni og Tarajoq á tímabilinu 27. ágúst til 29. september.

„Mæling á magni ókynþroska loðnu haustið 2021 benti til þess að veiðistofninn 2022/2023 yrði mun stærri en mælingarnar á honum núna gefa til kynna. Hinsvegar, er hlutfall eldri árgangs í verðandi hrygningarstofni með því hæsta sem sést hefur. Stofnmælingar í vetur munu varpa skýrara ljósi á stærðarhlutföll árganganna frá 2019 og 2020,“ segir í ráðgjafarskjalinu.

Náðu ekki nyrst

Í ráðgjafarskjalinu segir að niðurstaða stofnunarinnar byggi á umfangsmikilli yfirferð rannsóknaskipanna. Litlar tafir urðu á leiðangrinum vegna veðurs en hafís takmarkaði yfirferð á nyrsta hluta rannsóknarsvæðisins.

„Ekki er talið líklegt að loðna hafi verið á svæðinu sem var sleppt. Stofnmælingin hafði fremur lágan breytileikastuðul (CV) þar sem loðnan var nokkuð jafnt dreifð auk þess sem almennt var mest af kynþroska loðnu á svæðum með þétta yfirferð.“

Ekki ráðgjöf um upphafsaflamark 2023/24

Stærð hrygningarstofns er metin 763 þúsund tonn og fjöldi ókynþroska fiska var um 41 milljarður en samkvæmt samþykktri aflareglu þarf yfir 50 milljarða til að mælt verði með upphafsaflamarki fiskveiðiársins 2023/2024.

Gögn um niðurstöður ungloðnumælinganna verða lögð fyrir Alþjóðahafrannsóknaráðið (ICES) sem mun veita ráð um upphafsaflamark vertíðarinnar 2023/2024.

Fréttin hefur verið uppfærð

Tengdar fréttir

Hafrannsóknastofnun

Fengu fjarstýrðan kafbát

• Þorskar undir meðalþyngd fyrri ára
• Jónbjörn setti nafn sitt á nýja tegund
• Fjárfestu í nýjum rannsóknabúnaði
• Auglýsa Bjarna Sæmundsson til sölu

» Fleiri tengdar fréttir

Loðnuveiðar

Sást til loðnu norður af Vestfjörðum

• Loðnumæling tafðist er Árni leitaði í var
• Fyrstu skipin til loðnumælinga
• „Við urðum örlítið varir við loðnu“
• Töf á mælingu vegna viðgerðar

» Fleiri tengdar fréttir

• 1 blogg um fréttina

Bloggað um fréttina

• Sigurjón Þórðarson: SFS í bóndabeyju Hafró