15 milljónir til minnisvarða síldarstúlkna

Ríkisstjórnin hefur ákveðið að styrkja gerð minnisvarða um þátt síldarstúlkna í íslensku atvinnu- og efnahagslífi á síðustu öld með 15 milljónum króna. Minnisvarðanum verðu komið fyrir á sérbyggðu plani við Síldarminjasafnið á Siglufirði á næsta ári í tilefni þess að þá verða liðin 120 ár frá því að fyrsta síldin var veidd við Ísland.

Þetta kemur fram í tilkynningu á vef stjórnarráðsins.

Minnisvarðinn verður gerður á grundvelli hugmyndar Arthurs Ragnarssonar listamanns og er gert er ráð fyrir að minnisvarðinn verði vígður í lok júlí á næsta ári með helgardagskrá á Siglufirði þar sem framlag síldarstúlkna verður sérstaklega heiðrað.

„Þegar mest var á síldarárunum voru síldarstúlkurnar á Siglufirði um þúsund talsins og voru þær tilbúnar til að bjarga verðmætum dag og nótt, hvernig sem viðraði. Tekjur þeirra voru háðar því hvort síldin veiddist og aðeins var greitt fyrir saltaðar tunnur en engin kauptrygging til staðar,“ segir í tilkynningunni.

Frummynd af minnisvarðanum hefur verið gerð og verður unnið að gerð hans í vetur á vélaverkstæðum á Siglufirði. „Minnisvarðinn verður gerður úr sérstöku stáli sem norðlenskt veðurfar, sjóselta, rok, rigning, snjór og frost, vinnur ekki á.“

Mynd/Stjórnarráðið

• 1 blogg um fréttina

Bloggað um fréttina

• Ómar Ragnarsson: Löngu búið að minnast fiskveiða í Baskalandi og í Bretlandi …