Þurfi að skattleggja ofurhagnað sjávarútvegsins

Lilja Alfreðsdóttir, menningar- og viðskiptaráðherra, segir að ef ofurhagnaður myndast í ákveðnum atvinnugreinum, vegna tímabundins eða utanaðkomandi ástands, þá þurfi að skattleggja í samræmi við það.

„Það eru ákveðnar greinar sem eru að hagnast verulega á tímabundnu ástandi, þá hef ég sagt, og miðstjórn tekur undir það varðandi sjávarútveginn, að ef það er að myndast ofurhagnaður í ákveðnum atvinnugreinum þá þarf að skattleggja þær í samræmi við það,“ segir Lilja í samtali við mbl.is.

Er hvalrekaskattur eitthvað sem gæti sést á þessu kjörtímabili?

„Við erum auðvitað í ríkisstjórnarsamstarfi og þar var ekki kveðið á um hvalrekaskatt þegar verið var að semja um stjórnarsáttmálann,“ segir Lilja.

Hún segist ekki geta sagt til um það hvort eða hvenær hvalrekaskattur yrði að veruleika en hugmyndin hafi verið rædd á miðstjórnarfundi Framsóknar um helgina.

„Þetta er eitthvað sem við höfum trú á að þurfi þegar það eru svona óvenjulegar aðstæður.“

Framsókn réttu megin í mikilvægum málefnum

Lilja hélt ræðu á miðstjórnarfundinum þar sem hún kom víða við. Meðal annars tók hún fyrir efnahagsmál og orkumál, stríðið í Úkraínu og fleira.

Þá ræddi hún um það hvernig Framsóknarflokkurinn hefði staðið réttu megin í mikilvægum málefnum, meðal annars varðandi fullveldið, aðild að Atlantshafsbandalaginu, stækkun landhelginnar og fleira.

Lilja segir fundinn hafa verið góðan og hug vera í framsóknarfólki eftir góða sigra á sveitarstjórnarstiginu og í síðustu Alþingiskosningum.

• 1 blogg um fréttina

Bloggað um fréttina

• Guðjón E. Hreinberg: Rányrkja og græðgi sósíalismans