Fiskistofa birti þrjár ákvarðanir um veiðileyfasviptingar í janúar og snúa þær allar að brottkasti, en eitt mál hefur verið kært til lögreglu, að því er fram kemur í Morgunblaðinu.

Dragnóta- og netabáturinn Siggi Bjarna GK-5 hefur sviptur leyfi til veiða í atvinnuskyni í þrjár vikur vegna „meiriháttar brota“ sem Fiskistofa flokkar undir „refsinæmt athafnaleysi“ og hefur málið verið kært til lögreglustjórans á Suðurnesjum.

Athygli vekur að um sé að ræða annan bát Nesfisks ehf. sem sviptur er veiðileyfi vegna refsinæms athafnaleysis áhafnar á rúmum mánuði, en í desember var Sigurfari GK sviptur leyfi til veiða í fjórar vikur. Það mál var einnig kært til lögreglu.

Frétt af mbl.is

Sigurfari sviptur veiðileyfi vegna brottkasts

Þá var Rifsari SH-70 sviptur leyfi til veiða í atvinnuskyni í tvær vikur, vegna þess sem Fiskistofa segir alvarleg og ámælisverð brot sem framin voru af beinum ásetningi. Auk þess var handfærabáturinn Jón Bóndi BA-7 sviptur leyfi til strandveiða í sjö daga frá gildistöku næsta strandveiðileyfis vegna ámælisverðra brota, sem þó teljast ekki meiriháttar.