Tveir strandveiðibátar lentu í vandræðum

Tvær sjó­björg­un­ar­sveit­ir voru kallaðar út í morg­un til aðstoðar strand­veiðibát­um sem voru báðir í vand­ræðum með vél­búnað. Ann­ar bát­ur­inn var stadd­ur fyr­ir utan Vest­manna­eyj­ar og hinn í Faxa­flóa, en strand­veiðitíma­bilið hófst í gær.

Útkall á björg­un­ar­skipið Þór barst klukk­an 5.49 í morg­un og var skipið lagt úr höfn í Vest­manna­eyj­um klukk­an rétt rúm­lega 6 til aðstoðar strand­veiðibát þar sem sjó­dæla um borð hafði gefið sig.

Þór var kom­inn að bátn­um um 20 mín­út­um síðar. Vel gekk að tengja drátt­ar­tóg á milli og tók Þór bát­inn í tog og dró inn til hafn­ar í Vest­manna­eyj­um. Einn maður var um borð, að því er kem­ur fram í til­kynn­ingu frá Slysa­varn­ar­fé­lag­inu Lands­björgu.

Björg­un­ar­bát­ur­inn Sjöfn í Reykja­vík var síðan kallaður út laust fyr­ir klukk­an sjö til aðstoðar bát í Faxa­flóa sem einnig var í vél­ar­vand­ræðum. Um var að ræða strand­veiðibát sem var um 4 sjó­míl­ur norð-vest­ur af Gróttu.

Sjöfn var kom­in að bátn­um fimmtán mín­út­ur fyr­ir 8 og tók hann í tog. Einn maður var um borð, en ekki ligg­ur fyr­ir hvað olli vél­ar­vand­ræðum hans. Stefn­an var tek­in á Akra­nes og verður bát­ur­inn dreg­inn til hafn­ar þar.

• 1 blogg um frétt­ina

Bloggað um frétt­ina

• Ómar Ragn­ars­son: Beechcraft King Air aft­ur á dag­skrá eins og fyr­ir hálfri …