Hinstu för Wilson lokið
Setja bókamerki
Norska flutningaskipið Wilson Skaw, sem strandaði við Ennishöfða á Húnaflóa í apríl síðastliðnum, mun ljúka ferð sinni frá Akureyri til Noregs í dag.
Garðar Jóhannsson, framkvæmdastjóri Nesskipa, sem eru umboðsaðili útgerðar Wilson, sagði í samtali við blaðamann Morgunblaðsins í gær að áfangastaður skipsins væri í grennd við Álasund, en þar stæði til að rífa skipið í brotajárn.
„Skipið fór ekki í slipp á Akureyri. Þess í stað voru framkvæmdar ítarlegar skoðanir þar sem ástand skipsins var metið. Að skoðun lokinni komust menn að þeirri niðurstöðu að það væri ekki þess virði að gera við skipið. Það getur mikill kostnaður fylgt því að gera við skip, ásamt áhættu, og í tilviki Wilson Skaw þótti það einfaldlega ekki borga sig,“ sagði Garðar ennfremur.
Að sögn Garðars hóf skipið hinstu siglingu sína í síðustu viku, eftir að hafa legið við bryggju í Krossanesi, sem er rétt fyrir utan Akureyri, í um sex vikur. Þangað var það dregið úr Húnaflóa.
„Ferðin yfir hafið til Noregs hefur gengið mjög vel. Fyrir brottsiglingu Wilson höfðum við gert ráðstafanir til að tryggja að skipið yrði dregið örugglega á áfangastað sinn við Álasund þar sem það verður tekið til niðurrifs. Veðurskilyrði hafa verið með góðu móti,“ bætti Garðar við.
Rampur númer 1.100 vígður í dag
Tólf ára drengur illa fótbrotinn
Kíghósti á töluverðri dreifingu í samfélaginu
Tók barn upp úr innkaupakerru móður
„Gleymum því ekki að okkar vali fylgir ábyrgð“
Eldgosinu er lokið
„Miklar líkur á rýmingu á næstu sólarhringum“
Allar líkur á að Seðlabankinn lækki næst vexti
