Síldarvinnslan hefur ákveðið að loka bolfisksvinnslu fyrirtækisins á Seyðisfirði þann 30. nóvember næstkomandi. Mun ákvörðunin hafa áhrif á störf 30 af 33 starfsmönnum vinnslunnar, að því er fram kemur í fréttatilkynningu frá fyrirtækinu. Engum skipverja á togaranum Gullveri verður sagt upp vegna þessara breytinga.

Vakin er athygli á að fiskimjölsverksmiðja Síldarvinnslunnar á Seyðisfirði verði áfram í rekstri.

Í tilkynningunni segir að samráðsferli við starfsfólk og forystufólk í sveitarfélaginu hefst í framhaldinu með það að markmiði að milda áhrifin á nærsamfélagið og finna leiðir til að auðvelda fólki að vinna sem best úr erfiðum aðstæðum sem upp kunna að koma í kjölfarið.

Formlega var gengið frá kaupum Síldarvinnslunnar á útgerðarfélaginu Vísi hf. í Grindavík í desember á síðasta ári. Kaupunum fylgdi töluvert af aflaheimildum í bolfiski og stór hátæknivinnsla með mikla afkastagetu. Hefur því verið spáð um nokkurt skeið að bolfiskvinnsla Síldarvinnslunnar verði í Grindavík.

Frétt af mbl.is

Formlega gengið frá kaupunum á Vísi

„Rekstrarumhverfi bolfiskvinnslunnar hefur breyst hratt á undanförnum árum. Fjölmargir kostnaðarliðir hafa hækkað umtalsvert, öll fjármögnun er orðin dýrari og þorskheimildir hafa dregist saman. Þar að auki er bolfiskvinnslan á Seyðisfirði komin til ára sinna og ljóst að ráðast þarf í miklar framkvæmdir og fjárfestingu til að hún verði samkeppnishæf við fullkomnustu bolfiskhúsin í dag, þar sem tækniþróun hefur verið ör. Sá kostnaður hlypi á hundruðum milljóna króna og ljóst að jafn lítil starfseining stæði ekki undir slíku,“ segir í tilkynningu Síldarvinnslunnar.

Bendir félagið á að með fiskvinnslunni í Grindavík hafi fengist bætt geta til að mæta kröfum um aukna sjálfvirkni, betri nýtingu afurða og auka sveigjanleika í framleiðslu. „Til að standa undir slíkum kröfum hefur þróunin undanfarin ár verið í átt að stærri framleiðslueiningum með fjölbreyttari framleiðslu.“

Ekki léttvægt

Sem fyrr segir er gert ráð fyrir að lokunin muni hafa áhrif á 30 starfsmenn af þeim 33 sem starfa í vinnslu félagsins og segir að áformin um lokun séu ekki „ekki léttvæg með hagsmuni starfsmanna og nærsamfélagsins í huga.“ Hyggjast stjórnendur Síldarvinnslunnar eiga samræður við hagaðila, fulltrúa launafólks og sveitarstjórnarfólk á svæðinu til að leita leiða til að milda áhrifin.

„Hluta starfsfólks mun standa til boða vinna á öðrum starfstöðvum félagsins, en félagið rekur fiskimjölsverksmiðju á Seyðisfirði, uppsjávarvinnslu og fiskimjölsverksmiðju í Neskaupstað auk bolfiskvinnslu í Grindavík,“ segir í fréttatilkynningunni.

Þá munu stjórnendur Síldarvinnslunnar „óska eftir samtali við heimamenn með það fyrir augum að finna mótvægisaðgerðir sem styrkt gætu Seyðisfjörð til lengri tíma, þrátt fyrir brotthvarf bolfiskvinnslunnar. Verður þar á meðal annars horft til tækifæra og fjárfestinga í atvinnuuppbyggingu á svæðinu, svo sem í ferðaþjónustu, fiskeldi eða öðrum hugmyndum sem heimafólk hefur um framtíðaruppbyggingu. Markmiðið með þeirri vinnu er að fjárfesta í sjálfbærum verkefnum sem skila sér til langs tíma á svæðinu og skapa heilsársstörf.“

Fréttin hefur verið uppfærð.

Tengdar fréttir

Síldarvinnslan

Sjóvá og Síldarvinnslan áfram í samstarfi

• Samfélagsspor Síldarvinnslunnar yfir 10 milljarðar
• Þorsteinn Már skaut föstum skotum á SKE
• Síldarvinnslan með 10 milljarða hagnað
• SKE fer offari

» Fleiri tengdar fréttir

• Blogga um frétt