„Helvítis fokking húskarlar Norðmanna“ var á meðal skilaboða mótmælenda sjókvíaeldis, sem fjölmenntu Austurvöll fyrr í dag og kröfðust tafarlausra aðgerða gegn laxeldi í opnum sjókvíum. 

Guðlaugur Þór Þórðarson, umhverfis- og loftlagsráðherra, steig á svið að loknum eldræðum mótmælenda og þakkaði mótmælendum fyrir að hafa mætt og sýnt að Íslendingar séu tilbúnir að vernda íslenska náttúru.

„Gerðu þá eitthvað í því!“

„Gerðu þá eitthvað í því!“, hrópuðu þá mótmælendur hver í kapp við annan meðan aðrir bauluðu og nokkrir klöppuðu.

Lauk ráðherrann þá ræðu sinni á því að ítreka að skilaboðin væru skýr og þakkaði mótmælendum fyrir að leggja á sig skipulag og fyrirhöfn til þess að láta mótmælin verða að veruleika. Auk þess minnti hann á að engum sé dulið hvað ráðuneyti hans hafi gert í þágu umhverfismála.

Frétt af mbl.is

Fjölmenn mótmæli á Austurvelli hafin

Náttúruverndarsamtök og almennir borgarar kröfðust þess í dag að stjórnvöld grípi til tafarlausra aðgerða gegn laxeldi í opnum sjókvíum, að því er fram kemur í yfirlýsingu veiðifélaga og náttúruverndarsamtaka. Þar er fullyrt að laxeldi í opnum sjókvíum verði banabiti íslenskra laxastofna, verði ekkert að gert. Loforð stjórnvalda eru sögð innantóm.

Yfirlýsingin í heild sinni:

Undirrituð náttúruverndarsamtök og almennir borgararsem saman eru komnir hér á Austurvelli þann 7. október 2023 krefjast þess að stjórnvöld grípi til tafarlausra aðgerða gegn laxeldi í opnum sjókvíum. Laxeldi í opnum sjókvíum hefur mjög neikvæð áhrif á umhverfið, spillir vistkerfum á stórum svæðum í kringum kvíarnar og ógnar líffræðilegum fjölbreytileika. Þessi starfsemi ógnar villtum stofnum, lífríki fjarðanna og íslenskri náttúru almennt. Illa farnir og lúsétnir eldislaxar synda nú kynþroska upp íslenskar ár eftir nýlegt umhverfisslys. Ekki er langt síðan að talsmenn fiskeldisfyrirtækjanna fullyrtu að slík slys gætu aldrei orðið hér við land vegna nýrrar tækni og öryggisbúnaðar. Öll loforð um öryggi, eftirlit og umhverfisvernd í sjókvíaeldi hafa reynst innantóm. Laxeldi í opnum sjókvíum verður banabiti íslenskra laxastofna, verði ekkert að gert. Nú er því tímabært að staldra við og horfast í augu við staðreyndir málsins, grípa í taumana og segja: Hingað og ekki lengra! Við sem erum saman komin hér á Austurvelli í dag krefjumst þess að stjórnvöld axli ábyrgð í þessu máli, standi vörð um náttúruna og banni opið sjókvíaeldi hér við land.

Landssamband veiðifélaga, Verndarsjóður villtra laxastofna (North Atlantic Salmon Fund), Íslenski náttúruverndarsjóðurinn (Icelandic Wildlife Fund), Landvernd, Ungir umhverfissinnar, VÁ – Félag um vernd fjarðar og Náttúruverndarsamtök Íslands.

Frétt af mbl.is

Björk og Rosalia hvetja fólk til að fjölmenna á mótmælin

Tengdar fréttir

Fiskeldi

First Water leigir húsnæði Ísfélagsins

• Gjald á sjókvíaeldi hækkar um 46%
• Vantar stöðugleika í framboði af laxi
• Frestuðu slátrun til að hámarka verð
• Ræða sjókvíaeldið fyrir opnum dyrum

» Fleiri tengdar fréttir

• 1 blogg um fréttina

Bloggað um fréttina

• Ágúst Kárason: Afhverju ekki bara að fá þá til að rækta villtan …