„Niðurstöðurnar eru jákvæðar og sýna fram á að þróun og fjárfesting okkar í veiðiaðferðum og veiðibúnaði eftir lok hvalvertíðar 2022 er að skila marktækum árangri. Ég bendi þó á að þessar breytingar höfðu þegar verið innleiddar í júní 2023, áður en ráðherra tók ákvörðun sína um að stöðva hvalveiðar,“ segir Kristján Loftsson, framkvæmdastjóri Hvals hf.

Fyrirtækið hefur skilað skýrslu um hvalveiðarnar sem fram fóru í september og skilað til Matvælastofnunar og Fiskistofu, eins og mælt er fyrir um í reglugerð um veiðar á langreyðum.

Frétt af mbl.is

Kallar matvælaráðherra stalínista

Umtalsverðar framfarir

Í skýrslunni kemur fram að umtalsverðar framfarir hafi orðið í veiðitækni við hvalveiðarnar frá fyrra ári, sem séu afrakstur þróunar og fjárfestingar fyrirtækisins í veiðiaðferðum og veiðibúnaði sem tekinn var í notkun í hvalbátunum. Þannig hafi tafarlaus dauðatíðni langreyða aukist í tæp 80% frá vertíðinni 2022, en þá var hún metin á bilinu 59-67%. Í skýrslunni segir að stöðvun hvalveiða lungann úr síðasta sumri hafi valdið félaginu stórfelldu fjártjóni sem og tímabundin stöðvun veiða Hvals 8 þann 14. september.

Telur fyrirtækið að báðar ákvarðanirnar séu háðar fjölþættum annmörkum um form og efni og hyggst Hvalur leita réttar síns vegna þeirra. Umboðsmaður Alþingis er nú með stjórnsýslu ráðherra í málinu til skoðunar í framhaldi af kvörtun Hvals þar um.

Nán­ar er fjallað um málið í Morg­un­blaðinu í dag.

Tengdar fréttir

Hvalveiðar

Meirihluti óánægður með ákvörðun Bjarna

• Lög um hvalveiðar úrelt og krefjast endurskoðunar
• Hrefnuveiðar hefjast á Ísafirði í vor
• Gagnrýna ákvarðanir starfsstjórnar
• Segir næstu stjórn sitja uppi með ákvörðun Bjarna

» Fleiri tengdar fréttir