„Þetta þarf að fara að gerast“
Setja bókamerki
„Ég er ekki búin að taka ákvörðun. Það er verið vinna fyrir mig gögn í ráðuneytinu um þetta mál.“
Þetta sagði Bjarkey Olsen Gunnarsdóttir matvælaráðherra við mbl.is þegar hún var spurð um stöðu mála varðandi afgreiðslu umsóknar Hvals hf. um endurnýjun leyfis til hvalveiða.
„Ég hef sagt og stend við það að ég reyni að gera þetta eins hratt eins og ég mögulega get og vona að ég geti klárað afgreiðslu þessa mál sem allra fyrst. Það er markmiðið enda er það engum til hagsbóta að draga málið lengur en þörf er,“ segir Bjarkey.
Kristján Loftsson, framkvæmdastjóri Hvals hf., sagði í samtali við Morgunblaðið í síðasta mánuði að útséð væri um hvalveiðar í sumar en fyrirtækið bíður enn eftir svörum frá matvælaráðherra við umsókn um leyfi til veiða á langreyðum, sem send var ráðuneytinu í lok janúar.
Matvælaráðuneytið óskaði um miðjan mars eftir svörum frá Hval.hf við spurningum um ýmislegt sem það taldi varða málið. Hvalur svaraði þeim 21.mars og síðan hefur ekkert til erindisins spurst.
Ekki fundið fyrir þrýstingi
Spurð hvort hún sé ekki að falla á tíma með þessa ákvörðun segir Bjarkey:
„Jú þetta þarf að fara að gerast,“ segir Bjarkey og bætir því við að hún hafi ekki fundið fyrir neinum þrýstingi utanfrá varðandi þetta mál.
Bjarkey kynnti lagaeldisfrumvarp sitt á kynningarfundi á Hilton í fyrradag en það er til vinnslu á Alþingi.
„Þetta er stórt og mikið mál og það eru miklar tilfinningar gagnvart því sem ég skil og ber virðingu fyrir. Málið var komið inn á þingið þegar ég tók við embætti matvælaráðherra og ég er búin að leggja fyrir atvinnuveganefnd ákveðnar hugmyndir við breytingar sem nefndin er að fjalla um,“ segir Bjarkey.
Ófremdarástand í greininni
Bjarkey segist vonast til þess að málið klárist í vor.
„Mér finnst vera ófremdarástand í greininni eins og staðan er í dag og ég held að það séu flestir sammála um það að við getum ekki horft upp á annað eins og gerðist síðasta sumar. Við þurfum að reyna að ná betri tökum á þessu.“
„Höfum sloppið bærilega með skaða af þessu gosi“
Viðræður ekkert þokast frá því á þriðjudag
Hraun kemur úr þremur gígum: Virknin stöðug
Dómur þyngdur um þrjú ár
Hentugt gos fyrst gýs á annað borð
Yfir 300 stæði fóru undir hraun