„Við eigum að hætta hvalveiðum á Íslandi“
Setja bókamerki
„Þetta er ákvörðun sem hún tekur í samræmi við eitthvað sem hún verður að gera. Hún verður að gefa út leyfið samkvæmt stjórnarskrá,“ segir Guðmundur Ingi Guðbrandsson, formaður Vinstri grænna, inntur eftir viðbrögðum við ákvörðun matvælaráðherra um að heimila hvalveiðar á komandi vertíð.
„Auðvitað er mín pólitíska skoðun sú að við eigum að hætta hvalveiðum á Íslandi,“ sagði Guðmundur Ingi að ríkisstjórnarfundi loknum.
Hann segir bæði mikinn stuðning fyrir því á meðal almennings líkt og skoðanakannanir hafi sýnt fram á og að hvalveiðibann væri í takt við þróun á alþjóðavísu.
„En ég virði algjörlega ákvörðun ráðherrans og skil í hvaða stöðu hún er.“
Áfram stefna að banna hvalveiðar á Íslandi
Spurður hvort ákvörðunin sé ekki ákveðið högg fyrir flokkinn í ljósi nýrra skoðanakannana og hvort stjórnarsambandið sé mögulega of dýru verði keypt ítrekar Guðmundur Ingi að ráðherra hefði farið gegn lögum hefði hún tekið aðra ákvörðun en þessa.
„En að sjálfsögðu er stefnumótunarvinna í gangi í ráðuneytinu sem er að fara ofan í saumana á þessum málum. Við erum með lög frá 1946 til dæmis. Það hefur gríðarlega margt gerst á hinum alþjóðlega vettvangi og hér á Íslandi líka síðan þá. “
Það sé að sjálfsögðu áfram stefna Vinstri grænna að banna hvalveiðar á Íslandi. Jafnvel megi segja að þetta sé mögulegt skref í þá átt.
„Við sáum það í fyrra að veiðunum var frestað, reglugerð var hert. Þannig að við höfum verið að taka markviss skref á þessu kjörtímabili í áttina að þessu markmiði að banna hvalveiðar á Íslandi.“
Frumvarp um hvalveiðabann yrði fellt í dag
En nú hafa Vinstri grænir verið í ríkisstjórn í sjö ár. Hefur ekki verið nægur tími til þess að vinna betur að þessu og vera komin lengra í þessum málum?
„Ja, fyrstu fjögur árin var sjávarútvegsráðuneytið, nú matvælaráðuneytið, undir stjórn Sjálfstæðisflokksins. Það var enginn vilji til þess að ráðast í það að banna hvalveiðar þar. Ég vil líka minna á það að það er ekki meirihluti fyrir því á Alþingi að banna hvalveiðar. Þannig sú staða sem við erum í er kannski þröng að þessu leyti,“ segir Guðmundur Ingi.
En sérðu fram á að þið getið bannað hvaleiðar í þessu ríkisstjórnarsamstarfi?
„Ef núna yrði lagt fram frumvarp á Alþingi til að banna hvalveiðar þá telst mér það nú þannig til að það frumvarp yrði fellt því miður. Það hefur ekki bara með styrk ríkisstjórnarflokkana að gera heldur einmitt að það eru flokkar á Alþingi sem eru í stjórnarandstöðu sem eru á móti hvalveiðum.“
„Ég vil bara að fólk dæmi mig af mínum verkum.“
Inntur eftir viðbrögðum við gagnrýni um að landsfundur flokksins verði fyrst haldinn í október segir Guðmundur Ingi það vissulega skynsamlegt að halda landsfund sem fyrst. Þó þurfi tíma til að undirbúa fundinn, kafa ofan í rætur flokksins og keyra upp málefnastarf til að skerpa stefnu hans inn í kosningavetur.
Aðspurður kveðst hann litlu vilja svara um gagnrýni Björns Vals Gíslasonar, fyrrverandi varaformanns Vinstri grænna sem sagði flokkinn í miklum vandræðum m.a. vegna þess að Guðmundur Ingi hefði ekki sýnt af sér þá leiðtogahæfni sem þurfi til.
„Ég vil bara að fólk dæmi mig af mínum verkum.“
/frimg/1/52/68/1526898.jpg)
„Fólk elskar þennan mann“
Varnarmálaráðherra Ísraels rekinn
Líkur á vatnavöxtum og varað við skriðum
Nágranninn fannst látinn við nærliggjandi skóla
Tíu börn á spítala, þar af tvö á gjörgæslu