Kennsl borin á óþekktan sjómann

Norsk stjórnvöld hafa borið formleg kennsl á norskan sjómann, sem hvílt hefur í Flateyrarkirkjugarði í rúm 82 ár.

Leiði hans hefur verið merkt sem óþekktur sjómaður og hefur blómsveigur jafnan verið lagður á leiðið á sjómannadaginn.

Maðurinn hét Sigurd Arvid Nilsen og var 23 ára þegar þýskur kafbátur sökkti norska flutningaskipinu DS Fanefjeld við Vestfirði 9. apríl 1942. Nilsen var loftvarnaskytta um borð. 

Jarðsettur í Flateyrarkirkjugarði 

Nilsen var jarðsettur í Flateyrarkirkjugarði 17. apríl 1942. Á leiðinu er trékross með merkingunni óþekktur sjómaður og hefur jafnan verið lagður blómsveigur á leiðið á sjómannadaginn. Norska menningar- og jafnréttisráðuneytið segir að legsteinn með nafni Nilsens verði nú lagður á gröf hans.

Norsk stjórnvöld hafa að undanförnu unnið að því að finna og merkja norskar stríðsgrafir frá síðari heimsstyrjöld. Í tilkynningu, sem norska ráðuneytið sendi frá sér í vikunni, segist það hafa fengið upplýsingar um málið árið 2022 og síðan hafi verið unnið að því að bera kennsl á sjóliðann sem hvílir á Flateyri. Norsk og erlend skjalasöfn hafi verið rannsökuð og meðal annars leitað til Friðþórs Eydal, sem hefur mikið fjallað um sögu Íslands á tímum heimsstyrjaldarinnar.

Raunar var það grein, sem Friðþór skrifaði í blaðið Bæjarins besta í júní árið 2009, sem kom Norðmönnunum á sporið. Þar leiddi hann að því líkur að óþekkkti sjómaðurinn í Flateyrarkirkjugarði væri Sigurd Arvid Nilsen en hann var annar af tveimur loftvarnaskyttum úr norska sjóhernum sem voru um borð í Fanefjeld.

Friðþór sagði við Morgunblaðið að starfsmaður norska ráðuneytisins hefði haft samband við sig á síðasta ári en hann hafði þá heyrt af greininni í Bæjarins besta. Friðþór segist hafa veitt upplýsingar sem síðan voru bornar saman við gögn í norskum skjalasöfnum.

Lesa má meira um málið í Morgunblaðinu í dag